ନ୍ୟୁଜ ଡେକ୍ସ : ପଶ୍ଚିମବଙ୍ଗର ଦକ୍ଷିଣ ୨୪ ପରଗଣା ଜିଲ୍ଲାରେ ଘଟିଥିବା ବୋମା ବିସ୍ଫୋରଣ ମାମଲାରେ ଜାତୀୟ ତଦନ୍ତ ସଂସ୍ଥା (NIA) ମୁଖ୍ୟ ଅଭିଯୁକ୍ତ ଅହିଦୁଲ ଇସଲାମ ମୋଲ୍ଲାଙ୍କୁ ଗିରଫ କରିଛି। ବିଜୟଗଞ୍ଜ ବଜାର ଅଞ୍ଚଳରୁ ତାଙ୍କୁ ଧରାଯାଇଥିବା ସୂଚନା ମିଳିଛି। ସେ ଏହି ଷଡ଼ଯନ୍ତ୍ରର ଜଣେ ପ୍ରମୁଖ ସଦସ୍ୟ ଥିବା ନେଇ ଏନଆଇଏ ପକ୍ଷରୁ ଦାବି କରାଯାଇଛି।
ତଦନ୍ତରୁ ଜଣାପଡ଼ିଛି ଯେ ଚଳିତ ବର୍ଷ ମାର୍ଚ୍ଚ ମାସରେ ଦକ୍ଷିଣ ବାମୁନିଆ ଗାଁରେ ବୋମା ତିଆରି ସମୟରେ ବିସ୍ଫୋରଣ ଘଟିଥିଲା। ଏହି ଦୁର୍ଘଟଣାରେ ଜଣେ ବ୍ୟକ୍ତିଙ୍କ ମୃତ୍ୟୁ ଘଟିଥିବାବେଳେ ତିନିଜଣ ଗୁରୁତର ଆହତ ହୋଇଥିଲେ। ଏହା ପୂର୍ବରୁ ରାଜ୍ୟ ପୋଲିସ ମଧ୍ୟ ଏହି ମାମଲାରେ ଆଉ ଜଣେ ଅଭିଯୁକ୍ତଙ୍କୁ ଗିରଫ କରିଥିଲା।ଏନଆଇଏ ଅନୁଯାୟୀ, ଅହିଦୁଲ ଇସଲାମ ବୋମା ତିଆରି କାର୍ଯ୍ୟରେ ସକ୍ରିୟ ଭାବେ ସାମିଲ ଥିଲେ ଏବଂ ଘଟଣା ପରେ ପ୍ରମାଣ ନଷ୍ଟ କରିବାରେ ମଧ୍ୟ ଭୂମିକା ନେଇଥିଲେ। ଷଡ଼ଯନ୍ତ୍ରର ଅଂଶ ସ୍ୱରୂପ ବୋମା ପ୍ରସ୍ତୁତି ସମୟରେ ଏହି ବିସ୍ଫୋରଣ ଘଟିଥିବା କୁହାଯାଇଛି।ଏହି ମାମଲାରେ ଅନ୍ୟ ସହ-ଅଭିଯୁକ୍ତମାନଙ୍କୁ ଚିହ୍ନଟ କରିବା ପାଇଁ ଏନଆଇଏ ତଦନ୍ତକୁ ଆଗକୁ ବଢ଼ାଇଛି।
ଏହା ସହିତ ସମ୍ପର୍କିତ ଅନ୍ୟ ମାମଲାରେ ମଧ୍ୟ ଏନଆଇଏ କଡ଼ା ଅଭିଯାନ ଜାରି ରଖିଛି।ଏହି ମାସର ଆରମ୍ଭରେ ବିହାରରେ ଅବୈଧ ଅସ୍ତ୍ରଶସ୍ତ୍ର ଚାଲାଣ ସମ୍ପର୍କିତ ଏକ ମାମଲାରେ ମୁଜାଫରପୁରର କୁନ୍ଦନ କୁମାର ଓରଫ କୁନ୍ଦନ ଭଗତଙ୍କ ବିରୁଦ୍ଧରେ ଏନଆଇଏ ଅଭିଯୋଗ ପତ୍ର ଦାଖଲ କରିଛି। ସେ ଏହି ମାମଲାରେ ଷଷ୍ଠ ଅଭିଯୁକ୍ତ ଭାବେ ଚାର୍ଜସିଟ୍ ହୋଇଛନ୍ତି।ତଦନ୍ତରେ ଖୋଲାସା ହୋଇଛି ଯେ କୁନ୍ଦନ କୁମାର ନାଗାଲ୍ୟାଣ୍ଡରୁ ନିଷିଦ୍ଧ ବୋରର ଅସ୍ତ୍ରଶସ୍ତ୍ର ବେଆଇନ ଭାବେ କ୍ରୟ କରି ଚୋରାଚାଲାଣରେ ଲିପ୍ତ ଥିଲେ।
ସେ ଏହି ଅସ୍ତ୍ରଗୁଡ଼ିକୁ ବିହାରର ମାଓବାଦୀ ଓ ଅନ୍ୟ ଅପରାଧୀ ଗୋଷ୍ଠୀଙ୍କୁ ଯୋଗାଇ ଆସୁଥିବା କୁହାଯାଇଛି।ଏହି ସମସ୍ତ ଘଟଣାକୁ ନଜରରେ ରଖି ଏନଆଇଏ ଦେଶରେ ଅବୈଧ ଅସ୍ତ୍ର ଓ ବିସ୍ଫୋରକ ଜାଳକୁ ଧ୍ୱଂସ କରିବା ପାଇଁ ତଦନ୍ତକୁ ଅଧିକ ତୀବ୍ର କରିଛି।
