ନ୍ୟୁଜ ଡେକ୍ସ : ଆଜି ମେ’ ୧ ତାରିଖରେ ସାରା ବିଶ୍ୱରେ ଶ୍ରମିକ ଦିବସ ପାଳନ କରାଯାଉଛି। ଦେଶର ଉନ୍ନତି ଓ ଅଗ୍ରଗତିରେ ଶ୍ରମିକମାନଙ୍କ ଅସାଧାରଣ ଅବଦାନକୁ ସ୍ମରଣ କରିବା ସହ ସେମାନଙ୍କ ଅଧିକାର ସୁରକ୍ଷା ପାଇଁ ସଚେତନତା ବୃଦ୍ଧି କରିବା ହେଉଛି ଏହି ଦିନର ମୂଳ ଉଦ୍ଦେଶ୍ୟ।ପ୍ରତ୍ୟେକ କାର୍ଯ୍ୟକ୍ଷେତ୍ର ଶ୍ରମିକମାନଙ୍କ କଠିନ ପରିଶ୍ରମ ଉପରେ ନିର୍ଭରଶୀଳ।
କୃଷି, ଶିଳ୍ପ, ନିର୍ମାଣ କିମ୍ବା ସେବା ଖାତା—ସବୁଠି ଶ୍ରମିକମାନେ ନିଜ ଘାମ ଝରାଇ ଦେଶକୁ ଆଗକୁ ବଢ଼ାଇଛନ୍ତି। ସେଥିପାଇଁ ସେମାନଙ୍କୁ ଯଥୋଚିତ ସମ୍ମାନ ଓ ସୁବିଧା ଦେବା ଆବଶ୍ୟକ।ଇତିହାସ ଦୃଷ୍ଟିରୁ ଦେଖିଲେ, ୧୮୮୬ ମସିହାରେ ଆମେରିକାରେ ଶ୍ରମିକମାନେ ଦିନକୁ ୧୫ ଘଣ୍ଟା କାମ କରିବାର ବିରୋଧରେ ଆନ୍ଦୋଳନ କରିଥିଲେ। ସେମାନଙ୍କ ଦାବି ଥିଲା ୮ ଘଣ୍ଟା କାମ ସମୟ ନିର୍ଦ୍ଧାରଣ। ଏହି ଆନ୍ଦୋଳନ ସମୟରେ ଅନେକ ଶ୍ରମିକ ଜୀବନ ହାରାଇଥିଲେ ଓ ଅନେକ ଆହତ ହୋଇଥିଲେ। ପରେ ୧୮୮୯ ମସିହାରେ ଏହି ଦିନକୁ ଆନ୍ତର୍ଜାତୀୟ ଭାବେ ଶ୍ରମିକ ଦିବସ ଭାବେ ପାଳନ କରିବାକୁ ନିଷ୍ପତ୍ତି ନିଆଯାଇଥିଲା।
ତାହା ପରଠାରୁ ପ୍ରତିବର୍ଷ ମେ’ ୧ ତାରିଖରେ ବିଭିନ୍ନ ଦେଶରେ ଶ୍ରମିକମାନଙ୍କ ସମ୍ମାନରେ କାର୍ଯ୍ୟକ୍ରମ, ସଭା ଓ ରାଲି ଆୟୋଜନ କରାଯାଉଛି। ସରକାରୀ ଓ ବେସରକାରୀ ସଂସ୍ଥାମାନେ ମଧ୍ୟ ଏହି ଅବସରରେ ଶ୍ରମିକମାନଙ୍କ ସମସ୍ୟା ଓ ଅଧିକାର ଉପରେ ଆଲୋଚନା କରୁଛନ୍ତି।ଆଜିର ଦିନ ଆମକୁ ସ୍ମରଣ କରାଏ ଯେ ଶ୍ରମିକମାନଙ୍କ ସମ୍ମାନ ଓ ସୁରକ୍ଷା ବିନା କୌଣସି ଦେଶର ସମୃଦ୍ଧି ସମ୍ଭବ ନୁହେଁ। ସେହିପରି ସେମାନଙ୍କ ଅଧିକାରକୁ ସୁନିଶ୍ଚିତ କରିବା ସହ ସେମାନଙ୍କ ଜୀବନମାନ ଉନ୍ନତ କରିବା ଦିଗରେ ସମସ୍ତଙ୍କୁ ଏକତ୍ରିତ ହେବା ଆବଶ୍ୟକ।
