ନ୍ୟୁଜ ଡେକ୍ସ :ସିଦ୍ଧରମୈୟାଙ୍କ ଇସ୍ତଫା ପରେ କର୍ଣ୍ଣାଟକରେ ରାଜନୈତିକ ପରିବର୍ତ୍ତନ ଘଟିଛି। ବୁଧବାର ଦିନ ବେଙ୍ଗାଲୁରୁର ଲୋକଭବନରେ ଆୟୋଜିତ ଏକ ଭବ୍ୟ ଶପଥ ଗ୍ରହଣ ଉତ୍ସବରେ ଡିକେ ଶିବକୁମାର ରାଜ୍ୟର ୨୫ତମ ମୁଖ୍ୟମନ୍ତ୍ରୀ ଭାବେ ଶପଥ ନେଇଛନ୍ତି। ତାଙ୍କୁ ରାଜ୍ୟପାଳ ଶପଥ ପାଠ କରାଇଥିଲେ। ଏହି ଅବସରରେ ଜି ପରମେଶ୍ୱର ଉପମୁଖ୍ୟମନ୍ତ୍ରୀ ଭାବେ ଶପଥ ଗ୍ରହଣ କରିଛନ୍ତି।ଏହି ଶପଥ ଗ୍ରହଣ ଉତ୍ସବରେ କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖଡ୍ଗେ, ବିରୋଧୀ ଦଳ ନେତା ରାହୁଲ ଗାନ୍ଧୀ ସହିତ ବହୁ ଶୀର୍ଷ ନେତା ଉପସ୍ଥିତ ଥିଲେ।
ବିଦାୟୀ ମୁଖ୍ୟମନ୍ତ୍ରୀ ସିଦ୍ଧରମୈୟା ମଧ୍ୟ ଏହି କାର୍ଯ୍ୟକ୍ରମରେ ଯୋଗ ଦେଇଥିଲେ। ଶିବକୁମାରଙ୍କ ଭାଇ ଡିକେ ସୁରେଶ ସମଗ୍ର କାର୍ଯ୍ୟକ୍ରମର ପରିଚାଳନା ଦାୟିତ୍ୱ ନିର୍ବାହ କରିଥିଲେ। ଶପଥ ଗ୍ରହଣ ଆରମ୍ଭ ହେବା ସହିତ ଲୋକଭବନ ଆସପାସରେ ଭାରୀ ଭିଡ଼ ଜମିଥିଲା। ପ୍ରଶଂସକ ଓ କଂଗ୍ରେସ କର୍ମୀମାନେ ଉତ୍ସାହରେ ରାସ୍ତାକୁ ଧାଇଁ ଯାଇଥିବାରୁ ବିଧାନସଭା ଚାରିପାଖରେ ଗୁରୁତର ଟ୍ରାଫିକ ଜାମ୍ ସୃଷ୍ଟି ହୋଇଥିଲା।ମୁଖ୍ୟମନ୍ତ୍ରୀ ଭାବେ ଶପଥ ଗ୍ରହଣ ପୂର୍ବରୁ ଡିକେ ଶିବକୁମାର ତାଙ୍କ ମାତାଙ୍କ ଆଶୀର୍ବାଦ ନେଇଥିଲେ। ସେ ବେଙ୍ଗାଲୁରୁ ସଦାଶିବନଗର ସ୍ଥିତ ବାସଭବନରେ ମାତା ଗୌରମ୍ମାଙ୍କ ପାଦ ସ୍ପର୍ଶ କରି ଆଶୀର୍ବାଦ ଗ୍ରହଣ କରିଥିଲେ।
ଶପଥ ପୂର୍ବରୁ ତାଙ୍କ ଘରେ ବିଶେଷ ଧାର୍ମିକ ପୂଜା ଓ ରୀତିନୀତି ଆୟୋଜିତ ହୋଇଥିଲା, ଯେଉଁଥିରେ ପାଞ୍ଚରୁ ଅଧିକ ପୁରୋହିତ ଯୋଗଦେଇ ବିଶେଷ ପ୍ରାର୍ଥନା କରିଥିଲେ। ନୂତନ କ୍ୟାବିନେଟ୍ ଗଠନରେ ଜାତିଗତ ସମୀକରଣକୁ ଗୁରୁତ୍ୱ ଦିଆଯାଇଛି। ଭୋକ୍କାଲିଗା, ଲିଙ୍ଗାୟତ ଓ ଦଳିତ ସମ୍ପ୍ରଦାୟକୁ ପ୍ରତିନିଧିତ୍ୱ ଦେଇ ତିନି ଜଣ ମନ୍ତ୍ରୀଙ୍କୁ ପଦବୀ ଦିଆଯାଇଥିବାବେଳେ କୁରୁବା ସମ୍ପ୍ରଦାୟରୁ ଦୁଇଜଣ ମନ୍ତ୍ରୀ ନିଯୁକ୍ତ ହୋଇଛନ୍ତି। ଏହା ସହିତ ଅନୁସୂଚିତ ଜନଜାତି, ମୁସଲିମ ଓ ଖ୍ରୀଷ୍ଟିଆନ ସମ୍ପ୍ରଦାୟକୁ ମଧ୍ୟ ଗୋଟିଏ ଲେଖାଏଁ ମନ୍ତ୍ରୀ ପଦ ଦେଇ ସମତୁଳନ ରକ୍ଷା କରାଯାଇଛି।
