ନ୍ୟୁଜ ଡେକ୍ସ : ଦେଶର ଲୋକପ୍ରିୟ ସଙ୍ଗୀତ ରିଆଲିଟି ଶୋ ‘ଇଣ୍ଡିଆନ୍ ଆଇଡଲ୍’ର ଚୂଡ଼ାନ୍ତ ପର୍ଯ୍ୟାୟରେ ପହଞ୍ଚି ଓଡ଼ିଶାର ସୁଯୋଗ୍ୟା କନ୍ୟା ଜ୍ୟୋତିର୍ମୟୀ ନାୟକ ସମଗ୍ର ରାଜ୍ୟ ପାଇଁ ଗର୍ବ ଓ ଗୌରବର କାରଣ ପାଲଟିଛନ୍ତି। ନିଜର ସୁମଧୁର କଣ୍ଠସ୍ୱର, ସଙ୍ଗୀତ ପ୍ରତି ନିଷ୍ଠା ଏବଂ ଚମତ୍କାର ପରିବେଷଣ ମାଧ୍ୟମରେ ସେ ବିଚାରକ, ଅତିଥି ଏବଂ ଦେଶବ୍ୟାପୀ ଲକ୍ଷ ଲକ୍ଷ ଦର୍ଶକଙ୍କ ହୃଦୟ ଜିତିବାରେ ସଫଳ ହୋଇଛନ୍ତି। ତାଙ୍କର ଏହି ସଫଳତା ଓଡ଼ିଶାର ସଙ୍ଗୀତ ଜଗତ ପାଇଁ ଏକ ବଡ଼ ସଫଳତା ଭାବେ ବିବେଚନା କରାଯାଉଛି।
ଜ୍ୟୋତିର୍ମୟୀଙ୍କ ଚମତ୍କାର ପ୍ରଦର୍ଶନ ତାଙ୍କୁ ଇଣ୍ଡିଆନ୍ ଆଇଡଲ୍ର ଫାଇନାଲ୍ ମଞ୍ଚରେ ପହଞ୍ଚାଇଛି। ତାଙ୍କର ସ୍ୱରରେ ରହିଥିବା ମାଧୁର୍ଯ୍ୟ, ସଙ୍ଗୀତ ପ୍ରତି ସମର୍ପଣ ଓ ଆତ୍ମବିଶ୍ୱାସ ଦର୍ଶକଙ୍କୁ ବାରମ୍ବାର ଆକର୍ଷିତ କରିଛି। ପ୍ରତ୍ୟେକ ପର୍ଯ୍ୟାୟରେ ସେ ନିଜର ଗାୟନ ପ୍ରତିଭାର ଛାପ ଛାଡ଼ି ଆଜି ଦେଶର ସର୍ବୋତ୍ତମ ଗାୟକ-ଗାୟିକାଙ୍କ ମଧ୍ୟରେ ନିଜର ଏକ ସ୍ୱତନ୍ତ୍ର ସ୍ଥାନ ସୃଷ୍ଟି କରିପାରିଛନ୍ତି।ଜ୍ୟୋତିର୍ମୟୀଙ୍କ ଏହି ଉଲ୍ଲେଖନୀୟ ସଫଳତା ପାଇଁ ମୁଖ୍ୟମନ୍ତ୍ରୀ ମୋହନ ଚରଣ ମାଝି ତାଙ୍କୁ ଅଭିନନ୍ଦନ ଓ ଶୁଭେଚ୍ଛା ଜଣାଇଛନ୍ତି। ସେ ଜ୍ୟୋତିର୍ମୟୀଙ୍କ ଉଜ୍ଜ୍ୱଳ ଭବିଷ୍ୟତ କାମନା କରିବା ସହ ଇଣ୍ଡିଆନ୍ ଆଇଡଲ୍ର ମଞ୍ଚରେ ତାଙ୍କ ସଫଳ ଯାତ୍ରା ପାଇଁ ଆଶୀର୍ବାଦ ଜଣାଇଛନ୍ତି। ମୁଖ୍ୟମନ୍ତ୍ରୀଙ୍କ ଏହି ବାର୍ତ୍ତା ଜ୍ୟୋତିର୍ମୟୀଙ୍କ ପାଇଁ ଏକ ବଡ଼ ପ୍ରେରଣା ହୋଇଛି।ଜ୍ୟୋତିର୍ମୟୀଙ୍କ ଜୀବନଯାତ୍ରା ମଧ୍ୟ ଅନେକଙ୍କ ପାଇଁ ପ୍ରେରଣାଦାୟକ। ଇଣ୍ଡିଆନ୍ ଆଇଡଲ୍ ମଞ୍ଚକୁ ଆସିବା ପୂର୍ବରୁ ସେ କର୍କଟ ରୋଗୀମାନଙ୍କ ପାଇଁ ସଙ୍ଗୀତ ଥେରାପି ମାଧ୍ୟମରେ ସେବା କରୁଥିଲେ।
ସଙ୍ଗୀତକୁ କେବଳ ମନୋରଞ୍ଜନର ମାଧ୍ୟମ ନୁହେଁ, ବରଂ ମାନସିକ ଶାନ୍ତି ଓ ସକାରାତ୍ମକ ଶକ୍ତିର ଉତ୍ସ ଭାବେ ବ୍ୟବହାର କରି ସେ ଅନେକ ରୋଗୀଙ୍କ ମୁହଁରେ ହସ ଫୁଟାଇଥିଲେ। ଆଜି ସେହି ସେବାଭାବୀ ଯୁବତୀ ନିଜର ପ୍ରତିଭା ବଳରେ ଜାତୀୟ ସ୍ତରରେ ଏକ ସ୍ୱତନ୍ତ୍ର ପରିଚୟ ହାସଲ କରିଛନ୍ତି।ଜ୍ୟୋତିର୍ମୟୀଙ୍କ ସଫଳତାକୁ ନେଇ ସାରା ଓଡ଼ିଶାରେ ଖୁସିର ଲହରୀ ଖେଳିଯାଇଛି। ସାମାଜିକ ଗଣମାଧ୍ୟମରୁ ଆରମ୍ଭ କରି ବିଭିନ୍ନ ମହଲରେ ତାଙ୍କ ପାଇଁ ଶୁଭେଚ୍ଛାର ସୁଅ ଛୁଟିଛି। ସଙ୍ଗୀତପ୍ରେମୀ, କଳାକାର, ବୁଦ୍ଧିଜୀବୀ ଏବଂ ସାଧାରଣ ଲୋକ ସମସ୍ତେ ଜ୍ୟୋତିର୍ମୟୀଙ୍କ ସଫଳତାରେ ଗର୍ବ ଅନୁଭବ କରୁଛନ୍ତି ଏବଂ ଫାଇନାଲ୍ରେ ତାଙ୍କ ବିଜୟ କାମନା କରୁଛନ୍ତି।ଓଡ଼ିଶାର ଏହି ପ୍ରତିଭାବାନ ଝିଅଙ୍କ ଯାତ୍ରା ଏଭଳି ଭାବେ ସଫଳତାର ଶିଖରରେ ପହଞ୍ଚୁ ଏବଂ ସେ ଇଣ୍ଡିଆନ୍ ଆଇଡଲ୍ର ବିଜୟ ମୁକୁଟ ପିନ୍ଧି ସମଗ୍ର ଦେଶରେ ଓଡ଼ିଶାର ନାମକୁ ଆହୁରି ଉଜ୍ଜ୍ୱଳ କରନ୍ତୁ ବୋଲି ସମସ୍ତଙ୍କ ଆଶା। ମହାପ୍ରଭୁ ଶ୍ରୀଜଗନ୍ନାଥଙ୍କ କୃପାରେ ଜ୍ୟୋତିର୍ମୟୀ ତାଙ୍କ ସ୍ୱପ୍ନ ପୂରଣ କରି ଇଣ୍ଡିଆନ୍ ଆଇଡଲ୍ର ବିଜେତା ହୁଅନ୍ତୁ ବୋଲି ସାରା ଓଡ଼ିଶା ପ୍ରାର୍ଥନା କରୁଛି।
