ନ୍ୟୁଜ ଡେକ୍ସ : ଶିରିଡି ସାଇ ବାବାଙ୍କ ଚରିତ୍ରରେ ଅଭିନୟ କରି ସାରା ଦେଶରେ ପରିଚିତି ଲାଭ କରିଥିବା ଖ୍ୟାତନାମା ଅଭିନେତା ସୁଧୀର ଦଲଭିଙ୍କ ସ୍ୱାସ୍ଥ୍ୟାବସ୍ଥା ଏବେ ଗୁରୁତର ରହିଛି। ୮୬ ବର୍ଷୀୟ ଅଭିନେତା ପ୍ରାୟ ଦୁଇ ମାସ ଧରି ମୁମ୍ବାଇର ଲୀଳାବତୀ ହସ୍ପିଟାଲରେ ଚିକିତ୍ସାଧୀନ ଅଛନ୍ତି। ସେପ୍ସିସ୍ ଭଳି ଜୀବନଘାତକ ସଂକ୍ରମଣ ସହିତ ସେ ଲଢ଼ୁଥିବା ଡାକ୍ତରମାନେ କହିଛନ୍ତି ଏବଂ ତାଙ୍କ ଅବସ୍ଥା ଅତ୍ୟନ୍ତ ଗମ୍ଭୀର ରହିଛି।ଚିକିତ୍ସା ଖର୍ଚ୍ଚ ବହନ କରିବାକୁ ପରିବାର ଅସମର୍ଥ ହୋଇପଡ଼ିଥିବାରୁ ସାଧାରଣ ଜନତାଙ୍କୁ ସାହାଯ୍ୟ ପାଇଁ ନିବେଦନ କରାଯାଇଥିଲା।
ଏହା ପରେ ଶିରିଡି ସାଇ ବାବା ଟ୍ରଷ୍ଟ ସୁଧୀର ଦଲଭିଙ୍କ ସହାୟତା ପାଇଁ ଆଗେଇ ଆସିଛି। ଅକ୍ଟୋବର ୩୦, ୨୦୨୫ ତାରିଖରେ ଟ୍ରଷ୍ଟକୁ ଏକ ଚିଠି ମାଧ୍ୟମରେ ଅଭିନେତାଙ୍କ ଚିକିତ୍ସା ପାଇଁ ୧ କୋଟି ଟଙ୍କା ସହାୟତା ଅନୁରୋଧ କରାଯାଇଥିଲା। ଏହା ପରେ ଶିରିଡି ସାଇ ବାବା ଟ୍ରଷ୍ଟ ବମ୍ବେ ହାଇକୋର୍ଟର ଔରଙ୍ଗାବାଦ ବେଞ୍ଚରେ ଆବେଦନ ଦାଖଲ କରିଥିଲା। କୋର୍ଟର ଅନୁମତି ପରେ ଟ୍ରଷ୍ଟକୁ ସୁଧୀର ଦଲଭିଙ୍କ ଚିକିତ୍ସା ପାଇଁ ୧ କୋଟି ଟଙ୍କା ସହାୟତା ପ୍ରଦାନ କରିବାକୁ ମଞ୍ଜୁରି ମିଳିଛି। ଟ୍ରଷ୍ଟର ଓକିଲ ଅନିଲ ଏସ. ବଜାଜ ସୂଚନା ଦେଇଛନ୍ତି ଯେ, ଟ୍ରଷ୍ଟ ଦ୍ୱାରା ଗଠିତ ଏକ ଆଡ୍-ହକ୍ କମିଟି ଏହି ଆର୍ଥିକ ସହାୟତା ପ୍ରଦାନ କରିବାକୁ ନିଷ୍ପତ୍ତି ନେଇଛି। କୋର୍ଟର ଅନୁମୋଦନ ବିନା ଟ୍ରଷ୍ଟ ପାଣ୍ଠି ବ୍ୟବହାର କରାଯାଇପାରେ ନାହିଁ, ତେଣୁ ଆଇନଗତ ପ୍ରକ୍ରିୟା ସମ୍ପୂର୍ଣ୍ଣ କରାଯାଇଛି।
ଉଲ୍ଲେଖଯୋଗ୍ୟ ଯେ, ସୁଧୀର ଦଲଭି ୧୯୭୭ ମସିହାରେ ମୁକ୍ତିଲାଭ କରିଥିବା ‘ସାଇ ବାବା ଅଫ୍ ଶିରିଡି’ ଚଳଚ୍ଚିତ୍ରରେ ସାଇ ବାବାଙ୍କ ଭୂମିକା ନିର୍ବାହ କରି ବ୍ୟାପକ ପ୍ରଶଂସା ଲାଭ କରିଥିଲେ। ସେହି ଚରିତ୍ରଟି ତାଙ୍କର ପରିଚୟ ଓ ସ୍ୱାକ୍ଷର ଭାବେ ପରିଚିତ ହୋଇଥିଲା।ବର୍ତ୍ତମାନ ସୁଧୀର ଦଲଭିଙ୍କ ଅବସ୍ଥା ଉପରେ ସମସ୍ତ ଫିଲ୍ମ ପ୍ରେମୀ ଓ ଭକ୍ତମାନଙ୍କ ଦୃଷ୍ଟି ରହିଛି। ସେ ଶୀଘ୍ର ସୁସ୍ଥ ହୁଅନ୍ତୁ ବୋଲି ସମସ୍ତେ ପ୍ରାର୍ଥନା କରୁଛନ୍ତି।
