ନ୍ୟୁଜ ଡେକ୍ସ : ଓଡ଼ିଶା ଭିଜିଲାନ୍ସ ଅଧିକାରୀମାନେ ଶୁକ୍ରବାର ଦିନ ଯାଜପୁର ଜିଲ୍ଲା ବିଞ୍ଝାରପୁର ତହସିଲର ଅତିରିକ୍ତ ତହସିଲଦାର ତଥା ଓଆରଏସ ଅଧିକାରୀ ପ୍ରଦୀପ୍ତ କୁମାର ସେଠୀଙ୍କୁ ଲାଞ୍ଚ ଗ୍ରହଣ ଅଭିଯୋଗରେ ଗିରଫ କରିଛନ୍ତି। ଜଣେ ଜମି ମାଲିକଙ୍କଠାରୁ ୩୦ ହଜାର ଟଙ୍କା ଲାଞ୍ଚ ନେବା ସମୟରେ ସେ ଭିଜିଲାନ୍ସ ଜାଲରେ ପଡ଼ିଥିଲେ।
ସରକାରୀ ସୂତ୍ର ଅନୁଯାୟୀ, ଅଭିଯୋଗକାରୀଙ୍କୁ ସୁହାଇବା ଭଳି ଜମିର ସୀମା ନିର୍ଦ୍ଧାରଣ ରିପୋର୍ଟ ପ୍ରଦାନ କରିବା ପାଇଁ ଅତିରିକ୍ତ ତହସିଲଦାର ପ୍ରଦୀପ୍ତ କୁମାର ସେଠୀ ଏହି ଲାଞ୍ଚ ରାଶି ଦାବି କରିଥିବା ଅଭିଯୋଗ ହୋଇଥିଲା। ଏହା ସମ୍ପର୍କରେ ସୂଚନା ପାଇ ଭିଜିଲାନ୍ସ ଅଧିକାରୀମାନେ ଏକ ଜାଲ ବିଛାଇ ଅଭିଯୁକ୍ତକୁ ଲାଞ୍ଚ ଟଙ୍କା ନେବା ସମୟରେ ହାତେନାହାତେ ଧରିଥିଲେ।ଗିରଫ ସମୟରେ ତାଙ୍କ ଠାରୁ ସମ୍ପୂର୍ଣ୍ଣ ୩୦,୦୦୦ ଟଙ୍କା ଲାଞ୍ଚ ରାଶି ଜବତ କରାଯାଇଥିବା ଭିଜିଲାନ୍ସ ସୂତ୍ରରୁ ଜଣାପଡ଼ିଛି।
ଗିରଫ ପରେ କଟକ ଭିଜିଲାନ୍ସ ଥାନା ପକ୍ଷରୁ ଅଭିଯୁକ୍ତ ପ୍ରଦୀପ୍ତ କୁମାର ସେଠୀଙ୍କ ବିରୁଦ୍ଧରେ ଦୁର୍ନୀତି ନିବାରଣ (ସଂଶୋଧନ) ଆଇନ–୨୦୧୮ର ଧାରା ୭ ଅନୁଯାୟୀ ମାମଲା ନଂ–୩୬, ତାରିଖ ୧୯.୧୨.୨୦୨୫ ରୁଜୁ କରାଯାଇଛି। ଏହି ମାମଲାର ତଦନ୍ତ ଚାଲିଥିବା ବେଳେ, ଘଟଣା ସମ୍ପର୍କରେ ଓଡ଼ିଶା ଭିଜିଲାନ୍ସ ନିର୍ଦ୍ଦେଶାଳୟ ପକ୍ଷରୁ ସୂଚନା ଦିଆଯାଇଛି। ଏହି ଘଟଣାକୁ ନେଇ ଅଞ୍ଚଳରେ ଚର୍ଚ୍ଚା ସୃଷ୍ଟି ହୋଇଛି।
