ନ୍ୟୁଜ ଡେକ୍ସ : ଦିଲ୍ଲୀ ଓ ଏହାର ଆଖପାଖ ଅଞ୍ଚଳରେ ପାଗରେ ହଠାତ୍ ପରିବର୍ତ୍ତନ ଦେଖାଯିବା ସହ ଲୋକଙ୍କ ମୋବାଇଲ ଫୋନକୁ ଆସିଥିବା ଜରୁରୀକାଳୀନ ସତର୍କ ବାର୍ତ୍ତା ସମସ୍ତଙ୍କୁ ଚକିତ କରିଦେଇଛି। ରାଜସ୍ଥାନରୁ ଦିଲ୍ଲୀ ପର୍ଯ୍ୟନ୍ତ ବିଭିନ୍ନ ଅଞ୍ଚଳରେ ଝଡ଼ତୋଫାନ ଓ ପ୍ରବଳ ବର୍ଷାର ସମ୍ଭାବନା ଥିବାରୁ ସରକାର ପକ୍ଷରୁ ଏହି ଆଲର୍ଟ ଜାରି କରାଯାଇଛି।କେନ୍ଦ୍ର ସରକାରଙ୍କ ଜାତୀୟ ବିପର୍ଯ୍ୟୟ ପରିଚାଳନା କର୍ତ୍ତୃପକ୍ଷ (ଏନଡିଏମଏ) ପକ୍ଷରୁ ଏହି ସତର୍କ ସୂଚନା ପ୍ରସାରଣ କରାଯାଇଥିଲା।
ବିପଦ ସମୟରେ ଲୋକଙ୍କୁ ଶୀଘ୍ର ସୂଚନା ପହଞ୍ଚାଇବା ପାଇଁ ସେଲ୍ ବ୍ରୋଡକାଷ୍ଟ ସିଷ୍ଟମ ବ୍ୟବହାର କରାଯାଉଛି। ଏହି ବ୍ୟବସ୍ଥା ମାଧ୍ୟମରେ ମୋବାଇଲରେ ଏକ ସ୍ୱତନ୍ତ୍ର ଆଲର୍ଟ ଧ୍ୱନି ସହ ଫ୍ଲାସ୍ ମେସେଜ୍ ପହଞ୍ଚିଥିଲା, ଯେଉଁଥିରେ ଖରାପ ପାଗକୁ ନେଇ ସତର୍କ ରହିବାକୁ ପରାମର୍ଶ ଦିଆଯାଇଥିଲା।ଭାରତୀୟ ପାଣିପାଗ ବିଭାଗର ସୂଚନା ଅନୁସାରେ, ଉତ୍ତର ଭାରତର କିଛି ଅଞ୍ଚଳରେ ବର୍ତ୍ତମାନ ପାଗ ଅଶାନ୍ତ ରହିଛି। ଦିଲ୍ଲୀ-ଏନସିଆର ଏବଂ ରାଜସ୍ଥାନର ଅନେକ ଜିଲ୍ଲାରେ ତୀବ୍ର ବେଗରେ ପବନ ବହିବା ସହ ବଜ୍ରପାତ ହେବାର ସମ୍ଭାବନା ରହିଛି। ଧୂଳିଝଡ଼ କାରଣରୁ ସଡ଼କ ଯାତାୟାତ ମଧ୍ୟ ପ୍ରଭାବିତ ହୋଇପାରେ।
ଏଭଳି ପରିସ୍ଥିତିକୁ ଦୃଷ୍ଟିରେ ରଖି ଅତ୍ୟାବଶ୍ୟକ କାମ ନଥିଲେ ଘରୁ ବାହାରକୁ ନ ଯିବା ପାଇଁ ପ୍ରଶାସନ ପକ୍ଷରୁ ପରାମର୍ଶ ଦିଆଯାଇଛି। ସେହିପରି ଖୋଲା ସ୍ଥାନ, ଗଛ ତଳେ କିମ୍ବା ବିଦ୍ୟୁତ୍ ଖୁଣ୍ଟ ନିକଟରେ ନ ରହିବାକୁ ମଧ୍ୟ କୁହାଯାଇଛି।ବିନା ପୂର୍ବ ସୂଚନାରେ ମୋବାଇଲକୁ ଏହି ବାର୍ତ୍ତା ଆସିଥିବାରୁ ପ୍ରଥମେ ଅନେକ ଲୋକ ଭୟଭୀତ ହୋଇପଡ଼ିଥିଲେ। ପରେ ଏହା ସରକାରଙ୍କ ପକ୍ଷରୁ ନାଗରିକଙ୍କ ସୁରକ୍ଷା ପାଇଁ ଜାରି କରାଯାଇଥିବା ଏକ ସତର୍କ ସୂଚନା ବୋଲି ସ୍ପଷ୍ଟ ହୋଇଥିଲା।ବିଶେଷଜ୍ଞମାନଙ୍କ ମତରେ, ଏଭଳି ଆଗୁଆ ସତର୍କ ବାର୍ତ୍ତା ଲୋକଙ୍କୁ ସମୟ ପୂର୍ବରୁ ସଚେତନ କରିବାରେ ସହାୟକ ହେବ। ଏହା ଫଳରେ ପ୍ରାକୃତିକ ବିପର୍ଯ୍ୟୟ ସମୟରେ ଧନଜୀବନ ହାନିକୁ ବହୁ ପରିମାଣରେ ରୋକିବା ସମ୍ଭବ ହେବ।
