ନ୍ୟୁଜ ଡେକ୍ସ : ଆମେରିକା, ଇସ୍ରାଏଲ ଏବଂ ଇରାନ ମଧ୍ୟରେ ଚାଲିଥିବା ସଂଘର୍ଷ ଏବେ ଗୁରୁତର ରୂପ ନେଇଛି। ଏହି ଯୁଦ୍ଧ ଆଜି ୧୩ତମ ଦିନରେ ପହଞ୍ଚିଥିବା ବେଳେ ପଶ୍ଚିମ ଏସିଆର ପରିସ୍ଥିତି ଅତ୍ୟନ୍ତ ଉତ୍ତେଜନାପୂର୍ଣ୍ଣ ଓ ଅସ୍ଥିର ହୋଇପଡ଼ିଛି। ଏହି ସଂଘର୍ଷର ପ୍ରଭାବ ଏହି ଅଞ୍ଚଳର ସାଧାରଣ ଜୀବନ ଓ ଯାତାୟାତ ବ୍ୟବସ୍ଥା ଉପରେ ପଡ଼ିଛି। ବିଶେଷକରି ହଜାର ହଜାର ଭାରତୀୟ ପଶ୍ଚିମ ଏସିଆର ବିଭିନ୍ନ ଦେଶରେ ଫସି ରହିଥିବାରୁ ଚିନ୍ତା ବଢ଼ିଛି।
ଏହି ପରିସ୍ଥିତିରେ ଏୟାର ଇଣ୍ଡିଆ ଏବଂ ଏୟାର ଇଣ୍ଡିଆ ଏକ୍ସପ୍ରେସ ଗୁରୁବାର ଦିନ ମଧ୍ୟପ୍ରାଚ୍ୟ ଦେଶଗୁଡ଼ିକୁ ମୋଟ ୫୮ଟି ବିମାନ ଚଳାଚଳ କରିବାକୁ ଯୋଜନା କରିଛି। ଏହି ବିମାନଗୁଡ଼ିକ ମଧ୍ୟରେ ନିୟମିତ ଓ ସ୍ୱତନ୍ତ୍ର ସେବା ଦୁହିଁଟି ସାମିଲ ରହିଛି। ଏହା ମାଧ୍ୟମରେ ପଶ୍ଚିମ ଏସିଆରେ ଫସିଥିବା ଯାତ୍ରୀମାନଙ୍କୁ ଯାତାୟାତର ସୁବିଧା ମିଳିବା ସହିତ ଅନେକ ଭାରତୀୟଙ୍କୁ ସହାୟତା ମିଳିବ ବୋଲି ଆଶା କରାଯାଉଛି।ସୂଚନା ଅନୁଯାୟୀ ମୁମ୍ବାଇ ଓ କୋଝିକୋଡରୁ ସାଉଦି ଆରବର ରିୟାଦକୁ ସ୍ୱତନ୍ତ୍ର ବିମାନ ଚଳାଚଳ କରାଯିବ। ସେହିପରି ଜେଦ୍ଦା ଓ ମସ୍କଟକୁ ନିୟମିତ ବିମାନ ସେବା ପୂର୍ବବତ ଭାବେ ଜାରି ରହିବ। ଏହାସହ ପ୍ରାୟ ୪୦ଟି ଅତିରିକ୍ତ ବିମାନ ସଂଯୁକ୍ତ ଆରବ ଏମିରେଟ୍ସ ଏବଂ ସାଉଦି ଆରବକୁ ମଧ୍ୟ ଚଳାଚଳ କରିବାକୁ ଯୋଜନା ହୋଇଛି। ଯେଉଁ ଯାତ୍ରୀମାନଙ୍କର ବିମାନ ସେବା ଯୁଦ୍ଧ ପରିସ୍ଥିତି କାରଣରୁ ପ୍ରଭାବିତ ହୋଇଛି ସେମାନଙ୍କୁ ବିମାନ କମ୍ପାନୀମାନେ କିଛି ସୁବିଧା ମଧ୍ୟ ଦେଇଛନ୍ତି।
ସେମାନେ ଚାହିଲେ ନିଜ ଯାତ୍ରାର ତାରିଖ ପୁନଃନିର୍ଦ୍ଧାରଣ କରିପାରିବେ କିମ୍ବା କୌଣସି ଅତିରିକ୍ତ ଶୁଳ୍କ ବିନା ସମ୍ପୂର୍ଣ୍ଣ ଟଙ୍କା ଫେରସ୍ତ ପାଇପାରିବେ ବୋଲି କମ୍ପାନୀ ପକ୍ଷରୁ ଜଣାଇଦିଆଯାଇଛି।ଆମେରିକା, ଇସ୍ରାଏଲ ଓ ଇରାନ ମଧ୍ୟରେ ବଢ଼ୁଥିବା ବିବାଦ ଏହି ଅଞ୍ଚଳର ଆକାଶପଥ ଚଳାଚଳକୁ ମଧ୍ୟ ଗୁରୁତର ଭାବେ ପ୍ରଭାବିତ କରିଛି। ଅନେକ ସ୍ଥାନରେ ବିମାନ ମାର୍ଗଗୁଡ଼ିକୁ ବନ୍ଦ କରାଯାଇଥିବା ବେଳେ କେତେକ ମାର୍ଗରେ କଡ଼ା ପ୍ରତିବନ୍ଧ ଲାଗୁ ହୋଇଛି। ଏହା ସତ୍ତ୍ୱେ ଏୟାର ଇଣ୍ଡିଆ ଗ୍ରୁପ୍ ପରିସ୍ଥିତିକୁ ଦୃଷ୍ଟିରେ ରଖି ସଂଯମ ଓ ଯୋଜନାବଦ୍ଧ ଭାବରେ ବିମାନ ସେବା ପରିଚାଳନା କରିବାକୁ ନିଷ୍ପତ୍ତି ନେଇଛି।ଏୟାର ଇଣ୍ଡିଆ ମଙ୍ଗଳବାର ଜାରି କରିଥିବା ଏକ ବିବୃତ୍ତିରେ କହିଛି ଯେ ମାର୍ଚ୍ଚ ୧୧ ତାରିଖରେ ଜେଦ୍ଦା ଓ ମସ୍କଟକୁ ନିର୍ଦ୍ଧାରିତ ବିମାନ ସେବା ଜାରି ରହିବ।
ପୂର୍ବରୁ ଭାରତର ବେସାମରିକ ବିମାନ ଚଳାଚଳ ମନ୍ତ୍ରଣାଳୟ ଦେଇଥିବା ସୂଚନା ଅନୁଯାୟୀ ମାର୍ଚ୍ଚ ୯ ତାରିଖରେ ପଶ୍ଚିମ ଏସିଆରୁ ଭାରତୀୟ ବିମାନ କମ୍ପାନୀମାନେ ୪୫ଟି ବିମାନ ପରିଚାଳନା କରିଥିଲେ। ସେହି ବିମାନଗୁଡ଼ିକରେ ମୋଟ ୭ ହଜାର ୪୭ ଜଣ ଯାତ୍ରୀ ଯାତ୍ରା କରିଥିଲେ। ସ୍ଲଟ୍ ଏବଂ ଅନ୍ୟାନ୍ୟ ପରିସ୍ଥିତି ଉପରେ ନିର୍ଭର କରି ଏୟାର ଇଣ୍ଡିଆ ଏବଂ ଏୟାର ଇଣ୍ଡିଆ ଏକ୍ସପ୍ରେସ ସଂଯୁକ୍ତ ଆରବ ଏମିରେଟ୍ସକୁ ଓ ସେଠାରୁ ମୋଟ ୩୬ଟି ଅନିୟମିତ ବିମାନ ଚଳାଚଳ କରୁଛନ୍ତି।
ଏହି ପରିସ୍ଥିତିରେ ଭାରତୀୟ ଯାତ୍ରୀମାନଙ୍କ ସୁରକ୍ଷା ଓ ସୁବିଧାକୁ ଦୃଷ୍ଟିରେ ରଖି ବିମାନ ସେବା ଚାଲୁ ରଖାଯାଉଥିବା ବିମାନ କମ୍ପାନୀ ପକ୍ଷରୁ କୁହାଯାଇଛି।ପଶ୍ଚିମ ଏସିଆରେ ଯୁଦ୍ଧ ପରିସ୍ଥିତି ଆହୁରି ଗୁରୁତର ହେବାର ଆଶଙ୍କା ଥିବା ବେଳେ ଭାରତ ସରକାର ମଧ୍ୟ ସେଠାରେ ରହୁଥିବା ଭାରତୀୟମାନଙ୍କ ଉପରେ ନଜର ରଖିଛନ୍ତି। ପରିସ୍ଥିତି ଅନୁଯାୟୀ ଆଗାମୀ ଦିନରେ ଆହୁରି ବିଶେଷ ବିମାନ ସେବା ଚଳାଚଳ କରାଯାଇପାରେ ବୋଲି ସୂଚନା ମିଳିଛି।
