ନ୍ୟୁଜ ଡେକ୍ସ : ଭାରତର ପ୍ରସିଦ୍ଧ ସଙ୍ଗୀତ ଜଗତର ଦିଗଗଜ ଗାୟିକା ଆଶା ଭୋସଲେଙ୍କ ସ୍ୱାସ୍ଥ୍ୟାବସ୍ଥା ନେଇ ଚିନ୍ତା ବୃଦ୍ଧି ପାଇଛି। ତାଙ୍କୁ ଆଜି ମୁମ୍ବାଇର ବ୍ରିଚ କ୍ୟାଣ୍ଡି ହସ୍ପିଟାଲ ରେ ଭର୍ତ୍ତି କରାଯାଇଛି ଏବଂ ସେଠାରେ ତାଙ୍କର ଚିକିତ୍ସା ଚାଲିଛି।ପ୍ରଥମେ ହୃଦଘାତ ସମ୍ପର୍କିତ ଗୁଜବ ଚାଲିଥିବା ସତ୍ତ୍ୱେ, ତାଙ୍କ ନାତୁଣୀ ଜାନାଇ ଭୋସଲେ ସ୍ପଷ୍ଟ କରିଛନ୍ତି ଯେ ଆଶା ଭୋସଲେ ଛାତି ସଂକ୍ରମଣ ଓ ଅତ୍ୟଧିକ ଥକାପଣ ହେତୁ ହସ୍ପିଟାଲରେ ଭର୍ତ୍ତି ହୋଇଛନ୍ତି।
ସେ X ମାଧ୍ୟମରେ କହିଛନ୍ତି ଯେ ପରିବାର ପକ୍ଷରୁ ସମସ୍ତଙ୍କୁ ଗୋପନୀୟତା ରକ୍ଷା କରିବାକୁ ଅନୁରୋଧ କରାଯାଇଛି ଏବଂ ଶୀଘ୍ର ଅପଡେଟ୍ ଦିଆଯିବ।୮ ସେପ୍ଟେମ୍ବର ୧୯୩୩ରେ ଜନ୍ମ ନେଇଥିବା ଆଶା ଭୋସଲେ ଭାରତୀୟ ସଙ୍ଗୀତ ଜଗତର ଏକ ଅଦ୍ୱିତୀୟ ନାମ। ସେ ସାତ ଦଶକରୁ ଅଧିକ ସମୟ ଧରି ସଙ୍ଗୀତ ସେବାରେ ନିଯୁକ୍ତ ଅଛନ୍ତି। ତାଙ୍କ ଭଉଣୀ ଲତା ମଙ୍ଗେସକର ଙ୍କ ପରି ସେ ମଧ୍ୟ ସଙ୍ଗୀତରେ ଅପାର ସଫଳତା ହାସଲ କରିଥିଲେ, କିନ୍ତୁ ନିଜର ଅଲଗା ପରିଚୟ ସୃଷ୍ଟି କରିପାରିଥିଲେ।
ଶାସ୍ତ୍ରୀୟ ସଙ୍ଗୀତରୁ ପପ୍, ଗଜଲ ଓ ଲୋକସଙ୍ଗୀତ ପର୍ଯ୍ୟନ୍ତ ବିଭିନ୍ନ ଶୈଳୀରେ ସେ ହଜାର ହଜାର ଗୀତ ଗାଇଛନ୍ତି। ହିନ୍ଦୀ ସିନେମା ସହିତ ଅନେକ ଆଞ୍ଚଳିକ ଭାଷାରେ ମଧ୍ୟ ତାଙ୍କର ଅବଦାନ ଅପରିସୀମ। ୯୨ ବର୍ଷ ବୟସରେ ତାଙ୍କ ଅସୁସ୍ଥତାର ଖବର ପ୍ରଶଂସକମାନଙ୍କ ମଧ୍ୟରେ ଚିନ୍ତା ସୃଷ୍ଟି କରିଛି। ସମସ୍ତେ ତାଙ୍କର ଶୀଘ୍ର ସୁସ୍ଥତା ପାଇଁ ପ୍ରାର୍ଥନା କରୁଛନ୍ତି।
