ନ୍ୟୁଜ ଡେକ୍ସ : ଭାରତ ସରକାର ପୂର୍ବତନ କେନ୍ଦ୍ର ରେଳମନ୍ତ୍ରୀ ଓ ବରିଷ୍ଠ ବିଜେପି ନେତା ଦିନେଶ ତ୍ରିବେଦୀଙ୍କୁ ବାଂଲାଦେଶର ନୂତନ ହାଇକମିଶନର ଭାବେ ନିଯୁକ୍ତ କରିଛନ୍ତି। ଏହି ନିଷ୍ପତ୍ତି ଏପରି ଏକ ସମୟରେ ନିଆଯାଇଛି, ଯେତେବେଳେ ଭାରତ ଓ ବାଂଲାଦେଶ ମଧ୍ୟରେ ବିଭିନ୍ନ ଦ୍ୱିପକ୍ଷୀୟ ମୁଦ୍ଦା ଉପରେ ଗୁରୁତ୍ୱପୂର୍ଣ୍ଣ ଆଲୋଚନା ଚାଲିଛି ଓ ଉଭୟ ଦେଶ ସମ୍ପର୍କକୁ ଆହୁରି ମଜବୁତ କରିବାରେ ଲାଗିଛନ୍ତି।
ଦିନେଶ ତ୍ରିବେଦୀଙ୍କ ଏହି ନିଯୁକ୍ତିକୁ କେବଳ କୂଟନୈତିକ ନୁହେଁ, ରାଜନୈତିକ ଦୃଷ୍ଟିରୁ ମଧ୍ୟ ଗୁରୁତ୍ୱପୂର୍ଣ୍ଣ ମନାଯାଉଛି। ବିଶେଷକରି ପଶ୍ଚିମବଙ୍ଗର ରାଜନୀତିକ ପରିପ୍ରେକ୍ଷୀରେ ଏହାକୁ ବିଜେପିର ଏକ ରଣନୈତିକ ପଦକ୍ଷେପ ଭାବେ ଦେଖାଯାଉଛି, ଯାହା ଆଗାମୀ ନିର୍ବାଚନୀ ସମୀକରଣକୁ ପ୍ରଭାବିତ କରିପାରେ।ତାଙ୍କର ରାଜନୈତିକ ଯାତ୍ରା ଅନେକ ପରିବର୍ତ୍ତନର ସାକ୍ଷୀ ରହିଛି। ବିଜେପିରେ ଯୋଗଦେବା ପୂର୍ବରୁ ସେ ତୃଣମୂଳ କଂଗ୍ରେସର ଏକ ପ୍ରମୁଖ ନେତା ଥିଲେ ଓ ସଂଯୁକ୍ତ ପ୍ରଗତିଶୀଳ ମେଣ୍ଟ ସରକାରରେ ରେଳମନ୍ତ୍ରୀ ଭାବେ କାମ କରିଥିଲେ। ପରେ ସେ ଟିଏମସି ଛାଡ଼ି ୨୦୨୧ ମସିହାରେ ବିଜେପିରେ ଯୋଗଦେଇଥିଲେ।ବର୍ତ୍ତମାନ ଦିନେଶ ତ୍ରିବେଦୀ ପ୍ରଣୟ ବର୍ମାଙ୍କ ସ୍ଥାନ ନେବେ, ଯିଏ ଏପର୍ଯ୍ୟନ୍ତ ବାଂଲାଦେଶରେ ଭାରତର ହାଇକମିଶନର ଭାବେ କାର୍ଯ୍ୟରତ ଥିଲେ।
ପ୍ରଣୟ ବର୍ମାଙ୍କୁ ବର୍ତ୍ତମାନ ବ୍ରସେଲ୍ସକୁ ସ୍ଥାନାନ୍ତର କରାଯାଉଛି, ସେଠାରେ ସେ ୟୁରୋପୀୟ ସଂଘରେ ଭାରତର ରାଷ୍ଟ୍ରଦୂତ ଭାବେ ଦାୟିତ୍ୱ ନେବେ। ଏହି ପରିବର୍ତ୍ତନକୁ ଭାରତର ବୃହତ୍ତର କୂଟନୈତିକ ରଣନୀତିର ଅଂଶ ଭାବେ ଦେଖାଯାଉଛି।ସାମ୍ପ୍ରତିକ ବର୍ଷଗୁଡ଼ିକରେ ବାଂଲାଦେଶର ରାଜନୈତିକ ପରିବର୍ତ୍ତନ ଭାରତ-ବାଂଲାଦେଶ ସମ୍ପର୍କରେ ପ୍ରଭାବ ପକାଇଛି। ଶେଖ୍ ହସିନାଙ୍କ ବହିଷ୍କାର ପରେ ମହମ୍ମଦ ୟୁନୁସଙ୍କ ନେତୃତ୍ୱରେ ଏକ ନୂତନ ସରକାର ଗଠିତ ହୋଇଥିଲା।
ସେହି ସମୟରେ ହିନ୍ଦୁ ସମ୍ପ୍ରଦାୟ ଉପରେ ହିଂସା ଘଟଣା ଦେଖାଯିବା ଦୁଇ ଦେଶ ମଧ୍ୟରେ ସମ୍ପର୍କକୁ ଅସ୍ଥିର କରିଥିଲା।ତଥାପି, ସମ୍ପ୍ରତି ହୋଇଥିବା ସାଧାରଣ ନିର୍ବାଚନରେ ତାରିକ ରହମାନ ପ୍ରଧାନମନ୍ତ୍ରୀ ହୋଇଥିବା ପରେ ଦୁଇ ଦେଶ ମଧ୍ୟରେ ସମ୍ପର୍କରେ ସୁଧାର ଆସିବାର ସଙ୍କେତ ମିଳିଛି।ଏହି ପରିପ୍ରେକ୍ଷିତରେ ଦିନେଶ ତ୍ରିବେଦୀଙ୍କ ନିଯୁକ୍ତି ଦୁଇ ଦେଶ ମଧ୍ୟରେ କୂଟନୈତିକ ସମ୍ପର୍କକୁ ଆହୁରି ସୁଦୃଢ଼ କରିବା ସହିତ ନୂଆ ଦିଗ ଦେବ ବୋଲି ଆଶା କରାଯାଉଛି।
