ନ୍ୟୁଜ ଡେକ୍ସ : ରାଜ୍ୟସଭା ସାଂସଦ ରାଘବ ଚଡ୍ଡାଙ୍କୁ ଦିଆଯାଇଥିବା ସୁରକ୍ଷାକୁ ନେଇ ଏବେ ରାଜନୈତିକ ମହଲରେ ଚର୍ଚ୍ଚା ବଢ଼ିଛି। ପଞ୍ଜାବ ସରକାର ତାଙ୍କ ‘Z+’ ସୁରକ୍ଷା ପ୍ରତ୍ୟାହାର କରିବା ପରେ, କେନ୍ଦ୍ର ସରକାର ତାଙ୍କୁ ‘Z’ ବର୍ଗର ସୁରକ୍ଷା ଦେଇପାରନ୍ତି ବୋଲି ସୂଚନା ମିଳୁଛି।ଭାରତରେ VIP ସୁରକ୍ଷାକୁ ଅନେକ ସ୍ତରରେ ବିଭକ୍ତ କରାଯାଇଛି, ଯାହାରେ ‘Z’ ବର୍ଗ ସୁରକ୍ଷା ଦ୍ୱିତୀୟ ସବୁଠାରୁ ମଜବୁତ ମନାଯାଏ।
ଏହି ସୁରକ୍ଷା ଅଧୀନରେ ପ୍ରାୟ ୨୨ ଜଣ ସୁରକ୍ଷା କର୍ମଚାରୀ ନିଯୁକ୍ତ ହୋଇଥାନ୍ତି। ଏଥିରେ ଦିଲ୍ଲୀ ପୋଲିସ, ITBP କିମ୍ବା CRPF ର ସଶସ୍ତ୍ର ଜବାନ ଥାଆନ୍ତି ଏବଂ କେତେକ ସ୍ଥିତିରେ NSG କମାଣ୍ଡୋମାନେ ମଧ୍ୟ ଯୋଡ଼ାଯାଆନ୍ତି। ସେମାନେ ୨୪ ଘଣ୍ଟା ବ୍ୟକ୍ତିଙ୍କ ସୁରକ୍ଷା ଦେଖନ୍ତି ଓ ଏସ୍କର୍ଟ ଗାଡ଼ି ସହିତ ଚଳାଚଳ କରନ୍ତି।ଏହି ସୁରକ୍ଷା ଦେବା ପୂର୍ବରୁ ‘ଥ୍ରେଟ୍ ଆସେସମେଣ୍ଟ’ କରାଯାଏ। ଇଣ୍ଟେଲିଜେନ୍ସ ବ୍ୟୁରୋ ଓ ଅନ୍ୟାନ୍ୟ ଗୁଇନ୍ଦା ସଂସ୍ଥା ଗୃହ ମନ୍ତ୍ରଣାଳୟକୁ ରିପୋର୍ଟ ଦେଇଥାନ୍ତି। ଯଦି ଜୀବନରେ ଗୁରୁତର ବିପଦ ଥିବା ନିଶ୍ଚିତ ହୁଏ, ତେବେ ସୁରକ୍ଷା ଦିଆଯାଏ। ଏପରି ସୁରକ୍ଷାର ଖର୍ଚ୍ଚ ମଧ୍ୟ ଅଧିକ।
ତଥ୍ୟ ଅନୁଯାୟୀ, ‘Z’ ବର୍ଗ ସୁରକ୍ଷା ପାଇଁ ପ୍ରତି ମାସ ପ୍ରାୟ ୧୫ରୁ ୨୦ ଲକ୍ଷ ଟଙ୍କା ଖର୍ଚ୍ଚ ହୋଇଥାଏ, ଯେତେବେଳେ ‘Z+’ ପାଇଁ ଏହା ୪୦ରୁ ୫୦ ଲକ୍ଷ ପର୍ଯ୍ୟନ୍ତ ଯାଇପାରେ। ସୁରକ୍ଷା କର୍ମଚାରୀଙ୍କ ଦରମା, ଯାନବାହାନ ଓ ଅସ୍ତ୍ରଶସ୍ତ୍ର ସମସ୍ତ ଖର୍ଚ୍ଚ ଏଥିରେ ସାମିଲ ଅଟେ।ନିୟମ ଅନୁଯାୟୀ, ସାଂସଦ, ମନ୍ତ୍ରୀ ଓ ସରକାରୀ ଅଧିକାରୀଙ୍କ ସୁରକ୍ଷା ଖର୍ଚ୍ଚ ସରକାର ବହନ କରେ। ଏହା ସାଧାରଣ ଲୋକଙ୍କ ଟାକ୍ସ ଟଙ୍କାରୁ ପୂରଣ ହୋଇଥାଏ। ତେବେ ବ୍ୟକ୍ତିଗତ ଭାବେ ଏହି ସୁରକ୍ଷା ନେଲେ ସମସ୍ତ ଖର୍ଚ୍ଚ ନିଜେ ବହନ କରିବାକୁ ପଡ଼େ।
