ନ୍ୟୁଜ ଡେକ୍ସ : ମୁଖ୍ୟ ନିର୍ବାଚନ କମିଶନର ଜ୍ଞାନେଶ କୁମାରଙ୍କୁ ପଦରୁ ହଟାଇବା ପାଇଁ ବିରୋଧୀ ଦଳଗୁଡ଼ିକ ଏକ ବଡ଼ ପଦକ୍ଷେପ ନେଇଛନ୍ତି। ବିରୋଧୀ ମେଣ୍ଟ ଇଣ୍ଡିଆର ମୋଟ ୧୯୩ ଜଣ ସାଂସଦ ଏହା ସମ୍ପର୍କରେ ଏକ ନୋଟିସରେ ସ୍ୱାକ୍ଷର କରିଛନ୍ତି। ଏହି ନୋଟିସ୍ ଶୁକ୍ରବାର ସଂସଦର ଉଭୟ ଗୃହରେ ଉପସ୍ଥାପିତ ହେବାର ସମ୍ଭାବନା ରହିଛି।ସୂଚନା ଅନୁଯାୟୀ, ସ୍ୱାକ୍ଷର କରିଥିବା ୧୯୩ ଜଣ ସାଂସଦଙ୍କ ମଧ୍ୟରୁ ୧୩୦ ଜଣ ଲୋକସଭାର ଏବଂ ୬୩ ଜଣ ରାଜ୍ୟସଭାର।
ତେବେ ଏହି ନୋଟିସ୍ ପ୍ରଥମେ କେଉଁ ଗୃହରେ ଉପସ୍ଥାପିତ ହେବ ସେଥିପାଇଁ ଏପର୍ଯ୍ୟନ୍ତ ସ୍ପଷ୍ଟ ସୂଚନା ମିଳିନାହିଁ।ମିଳିଥିବା ସୂଚନା ଅନୁସାରେ, ନୋଟିସରେ ସ୍ୱାକ୍ଷର କରିବା ପାଇଁ ସାଂସଦମାନଙ୍କ ମଧ୍ୟରେ ଭାରି ଉତ୍ସାହ ଦେଖାଯାଇଥିଲା। ଆବଶ୍ୟକ ସଂଖ୍ୟା ପୂରଣ ହୋଇଥିବା ପରେ ମଧ୍ୟ ଅନେକ ସାଂସଦ ଆଗକୁ ଆସି ନୋଟିସ୍ ଉପରେ ସ୍ୱାକ୍ଷର କରିଥିଲେ। ଜ୍ଞାନେଶ କୁମାରଙ୍କ ବିରୋଧରେ ଆଣାଯାଇଥିବା ଏହି ପ୍ରସ୍ତାବକୁ ଟିଏମସି ସହିତ ସମାଜବାଦୀ ପାର୍ଟି ଓ ଆମ ଆଦମୀ ପାର୍ଟିର ସମର୍ଥନ ମିଳିଛି। ଟିଏମସି ପକ୍ଷରୁ ମୁଖ୍ୟ ନିର୍ବାଚନ କମିଶନରଙ୍କ ଉପରେ ଖରାପ ଆଚରଣର ଅଭିଯୋଗ ଆଣାଯାଇଛି। ବଙ୍ଗଳାରେ ଆସନ୍ତା ନିର୍ବାଚନ ପୂର୍ବରୁ ନିର୍ବାଚନ କମିଶନ ପକ୍ଷରୁ ଆଇନ ଶୃଙ୍ଖଳା ବ୍ୟବସ୍ଥା ଉପରେ କଡ଼ା ନିୟନ୍ତ୍ରଣ ଓ ଚେତାବନୀ ଜାରି କରାଯାଇଥିବା ମଧ୍ୟ ଏହି ବିବାଦକୁ ଆହୁରି ତୀବ୍ର କରିଛି।ସଂସଦୀୟ ନିୟମ ଅନୁଯାୟୀ, ମୁଖ୍ୟ ନିର୍ବାଚନ କମିଶନରଙ୍କୁ ହଟାଇବା ପାଇଁ ଲୋକସଭାରେ କମରେ କମ ୧୦୦ ଜଣ ସାଂସଦ ଓ ରାଜ୍ୟସଭାରେ କମରେ କମ ୫୦ ଜଣ ସାଂସଦଙ୍କ ସ୍ୱାକ୍ଷର ଆବଶ୍ୟକ।
ବିରୋଧୀ ଦଳଗୁଡ଼ିକ ଦାବି କରିଛନ୍ତି ଯେ ଏହି ଆବଶ୍ୟକ ସଂଖ୍ୟା ପୂରଣ ହୋଇଛି।ଯଦି ଏହି ନୋଟିସ୍ ସଂସଦରେ ଉପସ୍ଥାପିତ ହୁଏ, ତେବେ ଭାରତର ଇତିହାସରେ ପ୍ରଥମ ଥର ପାଇଁ ମୁଖ୍ୟ ନିର୍ବାଚନ କମିଶନରଙ୍କୁ ହଟାଇବା ପାଇଁ ଏପରି ଆନୁଷ୍ଠାନିକ ପଦକ୍ଷେପ ନିଆଯିବ। ରିପୋର୍ଟ ଅନୁଯାୟୀ, ଏହି ନୋଟିସ୍ରେ ମୁଖ୍ୟ ନିର୍ବାଚନ କମିଶନରଙ୍କ ବିରୋଧରେ ସାତଟି ଅଭିଯୋଗ ଆଣାଯାଇଛି। ଏଥିରେ ପଦରେ ଥିବା ସମୟରେ ପକ୍ଷପାତପୂର୍ଣ୍ଣ ଆଚରଣ, ନିର୍ବାଚନ ଅନିୟମିତତା ତଦନ୍ତରେ ବାଧା ସୃଷ୍ଟି କରିବା ଏବଂ ଅନେକ ଭୋଟରଙ୍କୁ ଭୋଟ ଅଧିକାରରୁ ବଞ୍ଚିତ କରିବା ଭଳି ଅଭିଯୋଗ ଅନ୍ତର୍ଭୁକ୍ତ ଅଛି।ବିରୋଧୀ ଦଳଗୁଡ଼ିକ ପୂର୍ବରୁ ମଧ୍ୟ ନିର୍ବାଚନ କମିଶନ ଉପରେ ଶାସକ ବିଜେପିକୁ ଲାଭ ପହଞ୍ଚାଇବାର ଅଭିଯୋଗ କରିଆସୁଛନ୍ତି।
ବିଶେଷ କରି ଚାଲିଥିବା ସ୍ୱତନ୍ତ୍ର ସଘନ ସଂଶୋଧନ କାର୍ଯ୍ୟକ୍ରମକୁ ନେଇ ବିରୋଧୀ ଦଳ ପ୍ରଶ୍ନ ଉଠାଇଛନ୍ତି ଏବଂ ଏହାକୁ ଶାସକ ଦଳଙ୍କ ପକ୍ଷରେ ବ୍ୟବହାର କରାଯାଉଥିବା ଅଭିଯୋଗ କରିଛନ୍ତି।ଏହି ପ୍ରସଙ୍ଗରେ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ଓ ଟିଏମସି ମୁଖ୍ୟ ମମତା ବାନାର୍ଜୀ ମଧ୍ୟ ଗମ୍ଭୀର ଅଭିଯୋଗ କରିଛନ୍ତି। ସେ କହିଛନ୍ତି ଯେ ଭୋଟର ତାଲିକା ସଂଶୋଧନ ସମୟରେ ଅନେକ ପ୍ରକୃତ ଭୋଟରଙ୍କ ନାମ କାଟାଯାଉଛି, ଯାହା ଗଣତାନ୍ତ୍ରିକ ପ୍ରକ୍ରିୟା ପାଇଁ ଚିନ୍ତାଜନକ ବିଷୟ।
