ନ୍ୟୁଜ ଡେକ୍ସ : ମଧ୍ୟପ୍ରାଚ୍ୟରେ ଚାଲିଥିବା ଉତ୍ତେଜନା ମଧ୍ୟରେ ଆମେରିକାର ପୂର୍ବତନ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଇରାନକୁ ଖୋଲା ଧମକ ଦେଇଛନ୍ତି । ସେ ହର୍ମୁଜ ପ୍ରଣାଳୀ କୁ ୪୮ ଘଣ୍ଟା ମଧ୍ୟରେ ସମ୍ପୂର୍ଣ୍ଣ ଖୋଲିବାକୁ ଅଲ୍ଟିମେଟମ ଦେଇଛନ୍ତି ।ଟ୍ରମ୍ପ ତାଙ୍କ ସୋସିଆଲ ମିଡିଆ ପ୍ଲାଟଫର୍ମ ଟ୍ରୁଥ୍ ସୋସିଆଲ ରେ କହିଛନ୍ତି ଯେ ଯଦି ଇରାନ ନିର୍ଦ୍ଧାରିତ ସମୟ ମଧ୍ୟରେ କୌଣସି ସର୍ତ୍ତ ବିନା ଏହି ଗୁରୁତ୍ୱପୂର୍ଣ୍ଣ ସମୁଦ୍ର ପଥକୁ ଖୋଲି ନଦେଉ, ତେବେ ଆମେରିକା ଇରାନର ବିଭିନ୍ନ ପାୱାର ପ୍ଲାଣ୍ଟ ଉପରେ ସାମରିକ କାର୍ଯ୍ୟାନୁଷ୍ଠାନ କରିବ ।
ସେ ଆହୁରି ସଚେତନ କରିଛନ୍ତି ଯେ ଏହି ଆକ୍ରମଣ ଇରାନର ସର୍ବବୃହତ ଶକ୍ତି କେନ୍ଦ୍ରରୁ ଆରମ୍ଭ ହେବ । ଟ୍ରମ୍ପଙ୍କ ଏହି ବିବୃତ୍ତି ବିଶ୍ୱ ଶକ୍ତି ଯୋଗାଣ ଓ ସୁରକ୍ଷା ପାଇଁ ଗଭୀର ଚିନ୍ତା ସୃଷ୍ଟି କରିଛି ।ଏହି ସମୟରେ ଇସ୍ରାଏଲର ରାଜନୈତିକ ପରିସ୍ଥିତି ମଧ୍ୟ ଅସ୍ଥିର ହୋଇପଡ଼ିଛି । ପ୍ରଧାନମନ୍ତ୍ରୀ ବେଞ୍ଜାମିନ୍ ନେତାନ୍ୟାହୁଙ୍କ ମିଳିତ ସରକାରର କାର୍ଯ୍ୟକାଳ ଶେଷ ହେବାକୁ ଯାଉଥିବା ବେଳେ ଅକ୍ଟୋବରରେ ସାଧାରଣ ନିର୍ବାଚନ ସମ୍ଭାବନା ରହିଛି । ତଥାପି ଗାଜା ଓ ପଶ୍ଚିମ କୂଳରେ ଚାଲିଥିବା ସଂଘର୍ଷ ଏବଂ ଇରାନ ସହ ତଣ୍ଟା ବଢ଼ିବାରୁ ପରିସ୍ଥିତି ଅଧିକ ଗମ୍ଭୀର ହୋଇପଡ଼ିଛି ।
ଇସ୍ରାଏଲ ଲେବାନନରେ ଆକ୍ରମଣ ଜାରି ରଖିଥିବା ବେଳେ ହିଜବୋଲା ପକ୍ଷରୁ ପ୍ରତିକ୍ରିୟା ସ୍ୱରୂପ ରକେଟ ଆକ୍ରମଣ ହେଉଛି ।ରାଜନୈତିକ ବିଶେଷଜ୍ଞମାନଙ୍କ ମତରେ ଯୁଦ୍ଧ ପରିସ୍ଥିତି ନେତାନ୍ୟାହୁଙ୍କ ପାଇଁ ଶୀଘ୍ର ନିର୍ବାଚନ ଡାକିବାର ଅବସର ହୋଇପାରେ । କିନ୍ତୁ ଦୀର୍ଘସ୍ଥାୟୀ ଯୁଦ୍ଧ ଓ କ୍ଷତି ନିର୍ବାଚନ ଫଳାଫଳକୁ ପ୍ରଭାବିତ କରିପାରେ ।ମଧ୍ୟପ୍ରାଚ୍ୟରେ ଏହି ବୃଦ୍ଧିଶୀଳ ସଂଘର୍ଷ ଆଗାମୀ ଦିନରେ ବିଶ୍ୱ ରାଜନୀତି ଓ ଅର୍ଥନୀତିରେ ବଡ଼ ପ୍ରଭାବ ପକାଇପାରେ ବୋଲି ଆଶଙ୍କା କରାଯାଉଛି ।
