ନ୍ୟୁଜ ଡେକ୍ସ : ମାନବିକତା ଭୁଲିଗଲେ ବସ୍ କଣ୍ଡକ୍ଟର । ୫ ଟଙ୍କା ଭଡା ଦେଲେନି ବୋଲି ଦୁଇ ନାବାଳକ ଯାତ୍ରୀଙ୍କୁ ୨୫ କିଲୋମିଟର ବୁଲାଇଲା ଲକ୍ଷ୍ମୀ ବସ୍ । ୨ ଘଣ୍ଟା ପରେ ବସକୁ ଅଟକାଇ ଦୁଇ ଭାଇଙ୍କୁ ଉଦ୍ଧାର କଲେ ପରିବାରବର୍ଗ । ଏଭଳି ଅମାନବୀୟ କାର୍ଯ୍ୟ ପାଇଁ କଣ୍ଡକ୍ଟରଙ୍କୁ ବଜାର ଭିତରେ ଉଠ ବସ କରାଇଲେ ସ୍ଥାନୀୟ ଲୋକ ।
ଏଭଳି ଅଭାବନୀୟ ଘଟଣା ଘଟିଛି ମୟୂରଭଞ୍ଜ ଜିଲ୍ଲା ବେତନଟୀ ବ୍ଲକର ବୈଶିଙ୍ଗା ବଜାରରେ । ତେବେ ସୂଚନା ମୁତାବକ,ବୈଶିଙ୍ଗା ଗାଁର ସରୋଜ ପୁଥାଳଙ୍କ ପୁଅ ପୀୟୁଷ ଓ ନଡ଼ପୁର ଗାଁର ବ୍ରଜମୋହନ ବେହେରାଙ୍କ ପୁଅ ରୋହିତ ବୈଶିଙ୍ଗା ଆସିବା ପାଇଁ ଅପେକ୍ଷା କରିଥିଲେ। ନଡ଼ପୁର ଗାଁ ଛକରେ ଲକ୍ଷ୍ମୀ ବସରେ ଚଢ଼ିଥିଲେ। ତେବେ ଭଡ଼ା ଦେବା ପାଇଁ ପାଖରେ ଟଙ୍କା ନଥିବା କହିଥିଲେ।ବୈଶିଙ୍ଗା ବସଷ୍ଟାଣ୍ଡରେ ତାଙ୍କ ବାପା ଭଡ଼ା ଦେବେ ବୋଲି କହିଥିଲେ। କିନ୍ତୁ ବୈଶିଙ୍ଗା ପହଞ୍ଚିବା ପରେ ବସଷ୍ଟାଣ୍ଡରେ ବାପା ନଥିବାରୁ ବସରୁ ଓହ୍ଲାଇ ଦେବାକୁ ଅନୁରୋଧ କରିଥିଲେ।
ହେଲେ ମାନବିକତା ଭୁଲି ଯାଇଥିଲେ ବସ କଣ୍ଡକ୍ଟର। ବସର ଲାଷ୍ଟ ଷ୍ଟପେଜ କଲମା ପର୍ଯ୍ୟନ୍ତ ନେଇଯାଇଥିଲେ। ସେମାନଙ୍କ ସୁରକ୍ଷା ସୁନିଶ୍ଚିତ କରିବା ପରିବର୍ତ୍ତେ, ଦରିହା ଗ୍ରାମର ପ୍ରତାପ ବୈଥା ନାମକ କଣ୍ଡକ୍ଟର ସେମାନଙ୍କୁ ଓହ୍ଲାଇବାକୁ ମନା କରିଦେଲେ ଏବଂ ପ୍ରାୟ ୨୫ କିଲୋମିଟର ଦୂର କଲାମା ଷ୍ଟପ୍ ପର୍ଯ୍ୟନ୍ତ ଯାତ୍ରା ଜାରି ରଖିବାକୁ ବାଧ୍ୟ କଲେ।ମାତ୍ର ଦୁଇ ଘଣ୍ଟା ପରେ, ବସ୍ ବୈଶିଙ୍ଗା ଫେରିବା ପରେ ପୁଅମାନଙ୍କୁ ଉଦ୍ଧାର କରାଯାଇଥିଲା।
