ନ୍ୟୁଜ ଡେକ୍ସ : ରାଜ୍ୟ ପ୍ରଶାସନିକ ବ୍ୟବସ୍ଥାରେ ପୁନଃସଂଗଠନ ଲକ୍ଷ୍ୟରେ ସରକାର OAS ସ୍ତରରେ ବଡ଼ ପରିମାଣର ଅଦଳବଦଳ କରିଛନ୍ତି। ମୋଟ ୧୯ ଜଣ ଓଡିଶା ପ୍ରଶାସନିକ ସେବା ଅଧିକାରୀଙ୍କୁ ନୂତନ ଦାୟିତ୍ୱ ଦେଇ ବିଭିନ୍ନ ବିଭାଗ ଓ ଜିଲ୍ଲାରେ ନିଯୁକ୍ତ କରାଯାଇଛି। ଏହି ବଦଳିକୁ ନେଇ ପ୍ରଶାସନିକ ମହଳରେ ଚର୍ଚ୍ଚା ଜୋର ଧରିଛି ଏବଂ ଏହା ଦ୍ୱାରା କାର୍ଯ୍ୟକୁଶଳତା ଆହୁରି ବଢିବ ବୋଲି ଆଶା କରାଯାଉଛି।
ନୂତନ ବ୍ୟବସ୍ଥା ଅନୁଯାୟୀ, ରତ୍ନାକର ସାହୁଙ୍କୁ ସ୍ୱାସ୍ଥ୍ୟ ଓ ପରିବାର କଲ୍ୟାଣ ବିଭାଗର ଅତିରିକ୍ତ ଶାସନ ସଚିବ ଭାବେ ନିଯୁକ୍ତ କରାଯାଇଛି। ସେହି ସହିତ ସେ ଜାତୀୟ ସ୍ୱାସ୍ଥ୍ୟ ମିଶନର ନୋଡାଲ ଅଧିକାରୀ ଭାବେ ମଧ୍ୟ ଦାୟିତ୍ୱ ନିଭାଇବେ। ସୁଧାକର ନାୟକଙ୍କୁ କ୍ରୀଡ଼ା ଓ ଯୁବସେବା ବିଭାଗର ଅତିରିକ୍ତ ଶାସନ ସଚିବ ଭାବେ ଦାୟିତ୍ୱ ଦିଆଯାଇଛି।ସେହିପରି ଶ୍ବେତ କୁମାର ଦାସଙ୍କୁ MKCG ମେଡିକାଲ କଲେଜର ରେଜିଷ୍ଟ୍ରାର ଭାବେ ନିଯୁକ୍ତ କରାଯାଇଥିବାବେଳେ ପ୍ରମୋଦ କୁମାର ପୃଷ୍ଟିଙ୍କୁ ନବରଙ୍ଗପୁରର ଅତିରିକ୍ତ ଜିଲ୍ଲାପାଳ ଭାବେ ପୋଷ୍ଟିଂ ମିଳିଛି। ସଚ୍ଚିଦାନନ୍ଦ ନାୟକଙ୍କୁ ଗଞ୍ଜାମ ଜିଲ୍ଲାର ଅତିରିକ୍ତ ଜିଲ୍ଲାପାଳ ଭାବେ ଦାୟିତ୍ୱ ଦିଆଯାଇଛି।ଅନ୍ୟପଟେ, ତପନ କୁମାର ଖୁଣ୍ଟିଆଙ୍କୁ ବାଲେଶ୍ୱର ଜିଲ୍ଲାର ଅତିରିକ୍ତ ଜିଲ୍ଲାପାଳ ଭାବେ ନିଯୁକ୍ତ କରାଯାଇଥିବାବେଳେ ସବ୍ୟସାଚୀ ପଣ୍ଡାଙ୍କୁ ବାମନଘାଟି-ରାଇରଙ୍ଗପୁର ଉପଜିଲ୍ଲାପାଳ ଭାବେ ନୂତନ ଦାୟିତ୍ୱ ମିଳିଛି।
ବିଜୟ କୁମାର ନାୟକଙ୍କୁ ଭିତ୍ତିଭୂମି ଉନ୍ନୟନ ନିଗମର ଭୂମି ଅଧିକାରୀ ଭାବେ ପୋଷ୍ଟିଂ ଦିଆଯାଇଛି।ସରକାରଙ୍କ ଏହି ପଦକ୍ଷେପକୁ ପ୍ରଶାସନିକ ଦୃଢତା ବଢାଇବା ଓ ବିଭିନ୍ନ ବିଭାଗର କାର୍ଯ୍ୟସଂଚାଳନକୁ ଆହୁରି ସୁଚାରୁ ଭାବେ କରିବା ପାଇଁ ଏକ ପ୍ରୟାସ ଭାବେ ଦେଖାଯାଉଛି। ନୂତନ ଦାୟିତ୍ୱ ପାଇଥିବା ଅଧିକାରୀମାନେ ନିଜ ନିଜ କ୍ଷେତ୍ରରେ ଦକ୍ଷତା ଓ ଅନୁଭବକୁ କାମରେ ଲାଗାଇ ଲୋକସେବାକୁ ଆହୁରି ଦୃଢ କରିବେ ବୋଲି ସରକାର ଆଶା ପ୍ରକାଶ କରିଛନ୍ତି।
