ନ୍ୟୁଜ ଡେକ୍ସ : ପଶ୍ଚିମବଙ୍ଗ ବିଧାନସଭା ନିର୍ବାଚନ-୨୦୨୬ର ଫଳାଫଳ ଦେଶର ରାଜନୀତିରେ ଏକ ନୂତନ ଅଧ୍ୟାୟ ରଚିଛି। ଦୀର୍ଘ ୧୫ ବର୍ଷ ଧରି ରାଜ୍ୟରେ ଶାସନ କରୁଥିବା ମମତା ବାନାର୍ଜୀଙ୍କ ତୃଣମୂଳ କଂଗ୍ରେସକୁ ପରାସ୍ତ କରି ଭାରତୀୟ ଜନତା ପାର୍ଟି ଏଥର ଶାସନ କ୍ଷମତାରେ ଆସିଛି।ଏହି ବିଜୟକୁ କେବଳ ଏକ ସାଧାରଣ ଶାସନ ପରିବର୍ତ୍ତନ ଭାବେ ନୁହେଁ, ବରଂ ଏକ ଐତିହାସିକ ଘଟଣା ଭାବେ ଦେଖାଯାଉଛି।
ପୂର୍ବ ଭାରତର ଅଙ୍ଗ, ବଙ୍ଗ ଓ କଳିଙ୍ଗ ଭୂଖଣ୍ଡରେ ନିଜର ପ୍ରଭାବ ବଢ଼ାଇବାର ଲକ୍ଷ୍ୟରେ ବିଜେପି ଦୀର୍ଘଦିନ ଧରି ଚେଷ୍ଟାରତ ଥିଲା। ବିହାର ଓ ଓଡ଼ିଶାରେ ପୂର୍ବରୁ ଶକ୍ତି ବଢ଼ାଇବା ପରେ ପଶ୍ଚିମବଙ୍ଗରେ ଏହି ବିଜୟ ସହିତ ଦଳର ଏହି ରଣନୀତିକ ଲକ୍ଷ୍ୟ ପୂରଣ ହୋଇଥିବା କୁହାଯାଉଛି।୨୦୨୧ରେ ‘ଖେଲା ହୋବେ’ ସ୍ଲୋଗାନ ସହ ତୃଣମୂଳ କଂଗ୍ରେସ ବିଜେପିକୁ ରୋକିଥିଲେ, କିନ୍ତୁ ଗତ କିଛି ବର୍ଷ ଧରି ଦୁର୍ନୀତି ଅଭିଯୋଗ, ସଂଗଠନ ଭିତରେ ଅସନ୍ତୋଷ ଓ ସରକାର ବିରୋଧୀ ହାୱା ଦଳ ପାଇଁ ବଡ଼ ଚାଲେଞ୍ଜ ହୋଇଉଠିଥିଲା। ଏହି ପରିସ୍ଥିତିକୁ ବିଜେପି ସୁଯୋଗରେ ପରିଣତ କରି ଜନମତକୁ ନିଜ ପକ୍ଷରେ ଆଣିବାରେ ସଫଳ ହୋଇଛି।
ଦଳର କେନ୍ଦ୍ରୀୟ ନେତୃତ୍ୱର ରଣନୀତି, ମଜବୁତ ସଂଗଠନ ଓ ସ୍ଥାନୀୟ ନେତାଙ୍କ ସକ୍ରିୟ ଭୂମିକା ଏହି ବିଜୟର ପ୍ରମୁଖ କାରଣ ଭାବେ ଦେଖାଯାଉଛି। ବିଶେଷ କରି ବୁଥ୍ ସ୍ତରରେ ଦଳର କାର୍ଯ୍ୟକଳାପ ଓ ଭୂମିସ୍ତରରେ ନିରନ୍ତର ସମ୍ପର୍କ ଏହି ସଫଳତାକୁ ସୁନିଶ୍ଚିତ କରିଛି।ଏହି ଫଳାଫଳ ଜାତୀୟ ରାଜନୀତିରେ ବିରୋଧୀ ଶକ୍ତି ପାଇଁ ଏକ ଧକ୍କା ଭାବେ ଦେଖାଯାଉଥିବା ବେଳେ ବିଜେପି ପାଇଁ ଏହା ପୂର୍ବ ଭାରତରେ ଆଉ ଏକ ମଜବୁତ ପଦକ୍ଷେପ ହେବ। ରାଜ୍ୟରେ ଏହି ପରିବର୍ତ୍ତନ ଆଗାମୀ ଦିନରେ ରାଜନୈତିକ ପରିସ୍ଥିତିକୁ କେମିତି ପ୍ରଭାବିତ କରିବ, ସେଥିପାଇଁ ସମସ୍ତଙ୍କ ନଜର ରହିଛି।
