ନ୍ୟୁଜ ଡେକ୍ସ : ପାକିସ୍ତାନର ବେଲୁଚିସ୍ତାନ ପ୍ରଦେଶରେ ବିଚ୍ଛିନ୍ନତାବାଦୀ ସଶସ୍ତ୍ର ଗୋଷ୍ଠୀ ବେଲୁଚ ଲିବରେସନ୍ ଆର୍ମି (ବିଏଲ୍ଏ) ପାକିସ୍ତାନୀ ସୁରକ୍ଷା ବାହିନୀ ଉପରେ ଏକ ବଡ଼ ଧରଣର ଆକ୍ରମଣ କରିଥିବା ଦାବି କରିଛି। ଗୋଷ୍ଠୀର କହିବା ଅନୁଯାୟୀ, ଏହା ଏକ ଆତ୍ମଘାତୀ ଅଭିଯାନ ଥିଲା।ବିଏଲ୍ଏ ପକ୍ଷରୁ ଜାରି ବିବୃତ୍ତିରେ କୁହାଯାଇଛି ଯେ, ଜିୱାନି ଅଞ୍ଚଳର ପାନୱାନ ତଟରକ୍ଷୀ ଶିବିରକୁ ବିସ୍ଫୋରକ ଭର୍ତ୍ତି ଏକ ଗାଡ଼ି ମାଧ୍ୟମରେ ଟାର୍ଗେଟ କରାଯାଇଥିଲା। ଏହି ଆକ୍ରମଣରେ ୩୦ରୁ ଅଧିକ ପାକିସ୍ତାନୀ ଅର୍ଦ୍ଧସାମରିକ କର୍ମଚାରୀ ନିହତ ହୋଇଥିବା ସହ ଅନେକ ଆହତ ହୋଇଥିବା ଦାବି କରାଯାଇଛି।
ତେବେ ଏହି ଦାବିର ସ୍ୱାଧୀନ ଭାବେ ସରକାରୀ ପୁଷ୍ଟି ହୋଇନାହିଁ।ରିପୋର୍ଟ ଅନୁଯାୟୀ, ଶୁକ୍ରବାର ସନ୍ଧ୍ୟାରେ ବିଏଲ୍ଏର ମାଜିଦ୍ ବ୍ରିଗେଡ୍ ପକ୍ଷରୁ ଏହି ଆକ୍ରମଣ କରାଯାଇଥିଲା। ଗୋଷ୍ଠୀର ଦାବି ଅନୁସାରେ, ଆତାଉଲ୍ଲା ବାଲୋଚ୍ ଓରଫ ଅଜମଲ୍ ନାମକ ଜଣେ ଆତ୍ମଘାତୀ ଆକ୍ରମଣକାରୀ ବିସ୍ଫୋରକ ଭର୍ତ୍ତି ଏକ ଟ୍ରକ୍କୁ ଶିବିର ଭିତରକୁ ନେଇ ଯାଇ ବିସ୍ଫୋରଣ ଘଟାଇଥିଲେ।ବିଏଲ୍ଏ ମୁଖପାତ୍ର ଜିଆଣ୍ଡ ବାଲୋଚ୍ କହିଛନ୍ତି ଯେ, ବିସ୍ଫୋରଣ ଏତେ ଶକ୍ତିଶାଳୀ ଥିଲା ଯେ ତଟରକ୍ଷୀ ଶିବିରର ବଡ଼ ଅଂଶ ଧ୍ୱଂସ ହୋଇଯାଇଥିଲା।
ଗୋଷ୍ଠୀର ମିଡିଆ ଶାଖା ପକ୍ଷରୁ କିଛି ଭିଡିଓ ମଧ୍ୟ ପ୍ରକାଶ କରାଯାଇଛି, ଯେଉଁଥିରେ ବିସ୍ଫୋରକ ଭର୍ତ୍ତି ଟ୍ରକ୍ ଶିବିର ଭିତରକୁ ପ୍ରବେଶ କରିବା ପରେ ବିସ୍ଫୋରଣ ଘଟିଥିବା ଏବଂ ପରବର୍ତ୍ତୀ ସମୟରେ ଶିବିରର ବ୍ୟାପକ କ୍ଷୟକ୍ଷତି ହୋଇଥିବା ଦେଖାଯାଇଛି।ଏହି ଘଟଣା ସମ୍ପର୍କରେ ପାକିସ୍ତାନ ସରକାର କିମ୍ବା ସୁରକ୍ଷା ବାହିନୀ ପକ୍ଷରୁ ବିସ୍ତୃତ ସରକାରୀ ସୂଚନା ଏପର୍ଯ୍ୟନ୍ତ ପ୍ରକାଶ କରାଯାଇନାହିଁ।
