ନ୍ୟୁଜ ଡେକ୍ସ :ଶ୍ରୀଜଗନ୍ନାଥଙ୍କ ବିଶ୍ୱପ୍ରସିଦ୍ଧ ରଥଯାତ୍ରା ଓ ବାହୁଡ଼ା ଯାତ୍ରାକୁ ସୁରକ୍ଷିତ, ସୁପରିଚାଳିତ ଏବଂ ଶୃଙ୍ଖଳିତ ଭାବେ ସମ୍ପନ୍ନ କରିବା ପାଇଁ ଶ୍ରୀମନ୍ଦିର ପ୍ରଶାସନ ପକ୍ଷରୁ ତିନିଟି ରଥ ପାଇଁ ସ୍ୱତନ୍ତ୍ର ନିର୍ଦ୍ଦେଶକ ଦଳ ଓ ବୈଷୟିକ ଦଳ ଗଠନ କରାଯାଇଛି। ଏଥିସହ ରଥ ଟଣା ସମୟରେ ବିଭିନ୍ନ ସେବକଙ୍କ ଦାୟିତ୍ୱ ଓ ସଂଖ୍ୟା ମଧ୍ୟ ଚୂଡ଼ାନ୍ତ କରାଯାଇଛି। ରଥଯାତ୍ରା ଏବଂ ବାହୁଡ଼ା ଯାତ୍ରା ସମୟରେ ରଥର ସୁରକ୍ଷା, ଗତି ନିୟନ୍ତ୍ରଣ ଏବଂ ପରମ୍ପରା ଅନୁଯାୟୀ ସମସ୍ତ ନୀତିକାନ୍ତି ସୁଚାରୁ ଭାବେ ସମ୍ପନ୍ନ କରିବା ଏହି ଦଳଗୁଡ଼ିକର ପ୍ରମୁଖ ଦାୟିତ୍ୱ ରହିବ।
ପ୍ରଶାସନିକ ବ୍ୟବସ୍ଥା ଅନୁଯାୟୀ, ତାଳଧ୍ୱଜ ରଥର ଦାୟିତ୍ୱ ପୁରୀ ଏସ୍ପି ପ୍ରତୀକ ସିଂହଙ୍କୁ ପ୍ରଦାନ କରାଯାଇଛି। ନନ୍ଦିଘୋଷ ରଥର ଦାୟିତ୍ୱ ପୁରୀ ଜିଲ୍ଲାପାଳ ଦିବ୍ୟଜ୍ୟୋତି ପରିଡ଼ାଙ୍କୁ ଦିଆଯାଇଥିବା ବେଳେ ଦେବଦଳନ ରଥର ଦାୟିତ୍ୱ ଅତିରିକ୍ତ ଜିଲ୍ଲାପାଳ ଶରତ ଚନ୍ଦ୍ର ବେହେରାଙ୍କୁ ଅର୍ପଣ କରାଯାଇଛି। ରଥଯାତ୍ରା ସମୟରେ ଏହି ଅଧିକାରୀମାନେ ନିଜ ନିଜ ରଥର ସମସ୍ତ କାର୍ଯ୍ୟକଳାପ ଉପରେ ନଜର ରଖିବେ ଏବଂ ଆବଶ୍ୟକ ସମୟରେ ନିର୍ଦ୍ଦେଶ ପ୍ରଦାନ କରିବେ।ତାଳଧ୍ୱଜ ରଥ ପାଇଁ ୧୧ ଜଣ ସଦସ୍ୟ ବିଶିଷ୍ଟ ନିର୍ଦ୍ଦେଶକ ଦଳ ଏବଂ ୪ ଜଣ ସଦସ୍ୟଙ୍କୁ ନେଇ ବୈଷୟିକ ଦଳ ଗଠନ କରାଯାଇଛି। ଦେବଦଳନ ରଥରେ ୧୨ ଜଣ ସଦସ୍ୟଙ୍କ ନିର୍ଦ୍ଦେଶକ ଦଳ ଓ ୪ ଜଣିଆ ବୈଷୟିକ ଦଳ ରହିଛି। ସେହିପରି ନନ୍ଦିଘୋଷ ରଥ ପାଇଁ ୧୩ ଜଣ ସଦସ୍ୟଙ୍କ ନିର୍ଦ୍ଦେଶକ ଦଳ ଏବଂ ୪ ଜଣ ସଦସ୍ୟଙ୍କ ବୈଷୟିକ ଦଳ ଗଠନ କରାଯାଇଛି। ଏହି ଦଳଗୁଡ଼ିକ ଶ୍ରୀଗୁଣ୍ଡିଚା ଯାତ୍ରା ଓ ବାହୁଡ଼ା ସମୟରେ ରଥ ଟଣା କାର୍ଯ୍ୟକୁ ସୁଚାରୁ ଭାବେ ପରିଚାଳନା କରିବେ।ପରମ୍ପରା ଅନୁଯାୟୀ ରଥ ଟଣା ସମୟରେ ବିଭିନ୍ନ ସେବକଙ୍କ ଉପସ୍ଥିତି ମଧ୍ୟ ନିର୍ଦ୍ଧାରଣ କରାଯାଇଛି।
ତାଳଧ୍ୱଜ ରଥରେ ସର୍ବାଧିକ ୨୫ ଜଣ ମହାରଣା ସେବକ, ୨ ଜଣ ରୂପକାର ସେବକ ଏବଂ ୨୫ ଜଣ ଭୋଇ ସେବକ କାର୍ଯ୍ୟ କରିବେ। ଦେବଦଳନ ରଥରେ ମଧ୍ୟ ସମାନ ଭାବେ ୨୫ ଜଣ ମହାରଣା ସେବକ, ୨ ଜଣ ରୂପକାର ସେବକ ଓ ୨୫ ଜଣ ଭୋଇ ସେବକ ରହିବେ।ନନ୍ଦିଘୋଷ ରଥ ପାଇଁ ସର୍ବାଧିକ ୨୭ ଜଣ ମହାରଣା ସେବକ, ୩ ଜଣ ରୂପକାର ସେବକ ଏବଂ ୨୬ ଜଣ ଭୋଇ ସେବକ ନିୟୋଜିତ ହେବେ। ଏହି ସେବକମାନେ କେବଳ ରଥ ଟଣାରେ ସହଯୋଗ କରିବେ ନାହିଁ, ବରଂ ଜରୁରୀ ପରିସ୍ଥିତିରେ ମଧ୍ୟ ରଥର ସୁରକ୍ଷା ଓ ପରିଚାଳନା ଦାୟିତ୍ୱ ତୁଲାଇବେ।ରଥଯାତ୍ରା ସମୟରେ ପୁରୀ ଏବଂ ଭଟ୍ଟାମୁଣ୍ଡାଇରୁ ଆସିଥିବା ଘଣ୍ଟୁଆ ସେବକମାନେ ନିର୍ଦ୍ଧାରିତ ସଂଖ୍ୟାରେ ପ୍ରତ୍ୟେକ ରଥରେ ଉପସ୍ଥିତ ରହିବେ। ସେମାନେ ଶ୍ରୀବିଗ୍ରହଙ୍କ ଦର୍ଶନରେ କୌଣସି ବାଧା ସୃଷ୍ଟି ନକରି ଶୃଙ୍ଖଳିତ ଏବଂ ସମତାଳରେ ଘଣ୍ଟ ବାଦନ କରିବେ। ଏହା ରଥଯାତ୍ରାର ପାରମ୍ପରିକ ପରିବେଶକୁ ଅକ୍ଷୁଣ୍ଣ ରଖିବାରେ ସହାୟକ ହେବ।ସେହିପରି ପ୍ରତ୍ୟେକ ରଥରେ ଦୁଇ ଜଣ ଲେଖାଏଁ ପତାକାଧାରୀ ମୁତୟନ କରାଯିବେ।
ସେମାନେ ରଥର ଗତି, ରଥ ଟଣାର ସମନ୍ୱୟ ଏବଂ ଆବଶ୍ୟକ ସମୟରେ ସଙ୍କେତ ପ୍ରଦାନ କରି ରଥ ପରିଚାଳନାରେ ସହଯୋଗ କରିବେ। ରଥର ଗତି ନିୟନ୍ତ୍ରଣ ଏବଂ ଶୃଙ୍ଖଳା ବଜାୟ ରଖିବାରେ ଏହି ପତାକାଧାରୀମାନଙ୍କ ଭୂମିକା ବେଶ୍ ଗୁରୁତ୍ୱପୂର୍ଣ୍ଣ ରହିବ।ରଥଯାତ୍ରା ଓ ବାହୁଡ଼ା ଯାତ୍ରାରେ ନିୟୋଜିତ ସମସ୍ତ ଅଧିକାରୀ, ନିର୍ଦ୍ଦେଶକ ଦଳ, ବୈଷୟିକ ଦଳ ଏବଂ ସେବକମାନଙ୍କୁ ଶ୍ରୀମନ୍ଦିର କାର୍ଯ୍ୟାଳୟ ପକ୍ଷରୁ ସ୍ୱତନ୍ତ୍ର ରଥ କର୍ଡନ ପାସ୍ ପ୍ରଦାନ କରାଯିବ। ଏହି ପାସ୍ ମାଧ୍ୟମରେ ସେମାନେ ନିର୍ଦ୍ଧାରିତ ସ୍ଥାନରେ ରହି ନିଜ ନିଜ ଦାୟିତ୍ୱ ସଠିକ୍ ଭାବେ ପାଳନ କରିପାରିବେ।ଶ୍ରୀମନ୍ଦିର ପ୍ରଶାସନର ଏହି ସ୍ୱତନ୍ତ୍ର ବ୍ୟବସ୍ଥା ଫଳରେ ଚଳିତ ବର୍ଷର ରଥଯାତ୍ରା ଓ ବାହୁଡ଼ା ଯାତ୍ରା ଅଧିକ ସୁରକ୍ଷିତ, ଶୃଙ୍ଖଳିତ ଏବଂ ସୁଚାରୁ ଭାବେ ସମ୍ପନ୍ନ ହେବ ବୋଲି ଆଶା କରାଯାଉଛି।
