ନ୍ୟୁଜ ଡେକ୍ସ : ବିଶ୍ୱ ତୈଳ ବଜାରରେ ଏବେ ଅସ୍ଥିରତା ଚରମ ସୀମାରେ ପହଞ୍ଚିଛି । ରୁଷ-ୟୁକ୍ରେନ ଯୁଦ୍ଧ ଦୀର୍ଘସ୍ଥାୟୀ ହେବା ସହ ଆମେରିକାର କଡ଼ା ପ୍ରତିବନ୍ଧକ ନୀତି ଭାରତର ଶକ୍ତି ସୁରକ୍ଷାକୁ ନେଇ ନୂଆ ଚିନ୍ତା ସୃଷ୍ଟି କରିଛି । ଆସନ୍ତା ମେ ୧୬ ତାରିଖ ମଧ୍ୟରାତ୍ରିରେ ରୁଷରୁ ରିହାତି ଦରରେ ଭାରତକୁ ମିଳୁଥିବା ଅଶୋଧିତ ତୈଳ ଆମଦାନୀ ଉପରେ ଲାଗିଥିବା ଆମେରିକୀୟ ‘ୱେଭର’ ଅବଧି ଶେଷ ହେବାକୁ ଯାଉଛି ।
ଯଦି ଏହାକୁ ଆହୁରି ବଢ଼ାଯାଇନଥାଏ, ତେବେ ଭାରତୀୟ ବଜାରରେ ପେଟ୍ରୋଲ ଓ ଡିଜେଲ ଯୋଗାଣ ଉପରେ ପ୍ରଭାବ ପଡ଼ିପାରେ ।ଗତ ୭୫ ଦିନ ଧରି ହୋର୍ମୁଜ ପ୍ରଣାଳୀରେ ଚାଲିଥିବା ଅସ୍ଥିରତା ଏବଂ ବିଶ୍ୱ ତୈଳ ଯୋଗାଣ ବ୍ୟବସ୍ଥାରେ ବାଧା ସୃଷ୍ଟି ହେବାରୁ ଭାରତ ଉପରେ ଚାପ ବଢ଼ିଛି । ରୁଷରୁ କମ୍ ଦରରେ ତେଲ କିଣିବାକୁ ନେଇ ଆମେରିକା ଭାରତ ଉପରେ କ୍ରମାଗତ ଚାପ ପକାଉଥିବା ବେଳେ, ଭାରତ ସ୍ପଷ୍ଟ କରିଛି ଯେ ଦେଶର ଶକ୍ତି ଯୋଗାଣ ଏବଂ ଆର୍ଥିକ ସ୍ଥିରତା ସର୍ବପ୍ରଥମ ପ୍ରାଥମିକତା । ବ୍ଲୁମବର୍ଗର ଏକ ରିପୋର୍ଟ ଅନୁଯାୟୀ, ୟୁକ୍ରେନ ଉପରେ ରୁଷର ଆକ୍ରମଣ ପରଠାରୁ ଆମେରିକା ଚାହୁଁଛି ଯେ ଭାରତ ରୁଷରୁ ଅଧିକ ପରିମାଣରେ ତେଲ କିଣିବା କମାଇଦିଅ । କିନ୍ତୁ ଭାରତୀୟ ଅଧିକାରୀମାନଙ୍କ ମତ ଅନୁସାରେ, ଏପରି ପରିସ୍ଥିତିରେ ଦେଶର ଇନ୍ଧନ ଆବଶ୍ୟକତା ପୂରଣ କରିବା ଅତ୍ୟାବଶ୍ୟକ । ତୈଳ ବଜାରରେ ଅସ୍ଥିରତା ଲାଗି ରହିଲେ ଦେଶରେ ମୁଦ୍ରାସ୍ଫୀତି ବଢ଼ିବା ସହ ସାଧାରଣ ଖାଉଟିଙ୍କ ଉପରେ ମଧ୍ୟ ଅଧିକ ଆର୍ଥିକ ଚାପ ପଡ଼ିପାରେ ।
ଏହି ସମ୍ଭାବ୍ୟ ସଙ୍କଟ ପୂର୍ବରୁ ଭାରତୀୟ ତୈଳ ବିଶୋଦନାଗାରଗୁଡ଼ିକ ରୁଷରୁ ବ୍ୟାପକ ହାରରେ ତେଲ ଆମଦାନୀ କରୁଛନ୍ତି । କ୍ଲେପର ତଥ୍ୟ ଅନୁଯାୟୀ, ମେ ମାସରେ ଭାରତର ରୁଷ ତୈଳ ଆମଦାନୀ ଦୈନିକ ୨.୩ ନିୟୁତ ବ୍ୟାରେଲରେ ପହଞ୍ଚି ଏକ ନୂଆ ରେକର୍ଡ ସୃଷ୍ଟି କରିଛି । ଅନ୍ୟପଟେ ଆମେରିକାର କଡ଼ା ନିୟମ କାରଣରୁ ଭାରତ ରୁଷରୁ ଆସୁଥିବା LNG ଗ୍ରହଣ କରିବାକୁ ମନା କରିଦେଇଛି । ଏହାର ପରିଣାମ ସ୍ୱରୂପ ଏକ ରୁଷୀୟ LNG ଜାହାଜ ସିଙ୍ଗାପୁର ନିକଟରେ ଅଟକି ରହିଥିବା ସୂଚନା ମିଳିଛି । ଏପରି ପରିସ୍ଥିତି ମଧ୍ୟରେ କେନ୍ଦ୍ର ପେଟ୍ରୋଲିୟମ ମନ୍ତ୍ରୀ Hardeep Singh Puri ଦେଶବାସୀଙ୍କୁ ଆଶ୍ୱାସନା ଦେଇଛନ୍ତି । CII ବାର୍ଷିକ ସମ୍ମିଳନୀରେ ସେ କହିଛନ୍ତି ଯେ, ଭାରତ ପାଖରେ ପର୍ଯ୍ୟାପ୍ତ ପରିମାଣର ଇନ୍ଧନ ମହଜୁଦ ରହିଛି ।
ଦେଶର LNG ଷ୍ଟକ୍ ୬୯ ଦିନ ପାଇଁ ପର୍ଯ୍ୟାପ୍ତ ଥିବା ବେଳେ LPG ଷ୍ଟକ୍ ୪୫ ଦିନ ପାଇଁ ମହଜୁଦ ଅଛି । ସେହିପରି ଦୈନିକ LPG ଉତ୍ପାଦନକୁ ୩୬ ହଜାର ଟନରୁ ବଢ଼ାଇ ୫୪ ହଜାର ଟନ କରାଯାଇଥିବା ସେ ସୂଚନା ଦେଇଛନ୍ତି ।ଏବେ ସବୁଙ୍କ ନଜର ୱାଶିଂଟନର ନିଷ୍ପତ୍ତି ଉପରେ ରହିଛି । ଯଦି ଆମେରିକା ପକ୍ଷରୁ ଭାରତକୁ ମିଳୁଥିବା ରିହାତି ଅବଧିକୁ ପୁଣି ଥରେ ବୃଦ୍ଧି କରାଯାଏ, ତେବେ ଭାରତୀୟ ବଜାରକୁ କିଛି ସମୟ ପାଇଁ ଆଶ୍ୱାସ ମିଳିପାରେ । ନଚେତ୍ ଆଗାମୀ ଦିନରେ ତୈଳ ଦର ବୃଦ୍ଧି ସହ ଦେଶର ଆର୍ଥିକ ସ୍ଥିତି ଉପରେ ମଧ୍ୟ ପ୍ରଭାବ ପଡ଼ିବା ଆଶଙ୍କା ରହିଛି ।
