ନ୍ୟୁଜ ଡେକ୍ସ : ସୋମବାର ଶିମଲାର ଲୋକଭବନରେ ଓଡ଼ିଶା ଗଣମାଧ୍ୟମ ପ୍ରତିନିଧି ଦଳ କବିନ୍ଦର ଗୁପ୍ତାଙ୍କୁ ଭେଟିଥିଲେ। ଏହି ଅବସରରେ ପ୍ରତିନିଧି ଦଳ ନିଜମାନଙ୍କର ରାଜ୍ୟ ଗସ୍ତ ଅନୁଭୂତି ସେୟାର କରିଥିବା ସହ ସାଂସ୍କୃତିକ ବିନିମୟ, ବିକାଶମୂଳକ ପଦକ୍ଷେପ ଏବଂ ଜାତୀୟ ସଂହତିକୁ ମଜବୁତ କରିବାରେ ଗଣମାଧ୍ୟମର ଭୂମିକା ଉପରେ ଆଲୋଚନା କରିଥିଲେ।ଆଲୋଚନା ସମୟରେ ରାଜ୍ୟପାଳ କହିଥିଲେ ଯେ ଏପରି ଗସ୍ତ ରାଜ୍ୟଗୁଡ଼ିକ ମଧ୍ୟରେ ପାରସ୍ପରିକ ବୁଝାମଣା ବୃଦ୍ଧି କରିଥାଏ।
ଭାରତର ଭାଷାଗତ ଓ ସାଂସ୍କୃତିକ ବିବିଧତାକୁ ଉଲ୍ଲେଖ କରି ସେ କହିଥିଲେ ଯେ ଏକତା ହେଉଛି ଦେଶର ସର୍ବବୃହତ ଶକ୍ତି। ସେ ଉପାନ୍ତ ଓ ସୀମାବର୍ତ୍ତୀ ଅଞ୍ଚଳରେ ସଂଯୋଗୀକରଣ ଉନ୍ନତି ପାଇଁ ହେଉଥିବା ପ୍ରୟାସ ବିଷୟରେ ମଧ୍ୟ ସୂଚନା ଦେଇଥିଲେ। ଦୀର୍ଘସ୍ଥାୟୀ ବିକାଶ ପାଇଁ ସ୍ଥାନୀୟ ଉତ୍ପାଦ, ଔଷଧୀୟ ଉଦ୍ଭିଦ ଚାଷ, ପ୍ରାକୃତିକ କୃଷି ଓ ଯୁବପିଢ଼ିଙ୍କ ଦକ୍ଷତା ବିକାଶକୁ ଗୁରୁତ୍ୱ ଦେବାକୁ ସେ ପରାମର୍ଶ ଦେଇଥିଲେ। ସରକାରୀ ପଦକ୍ଷେପଗୁଡ଼ିକୁ ସକାରାତ୍ମକ ଭାବେ ପ୍ରଚାର କରିବାରେ ଗଣମାଧ୍ୟମର ଗଠନମୂଳକ ଭୂମିକା ଆବଶ୍ୟକ ବୋଲି ସେ କହିଥିଲେ। ଏହାସହିତ ପ୍ରତିନିଧି ଦଳ ଆର୍ମି ଟ୍ରେନିଂ କମାଣ୍ଡ (ଆର୍ଟରାକ୍)ର ଅନାଡେଲ୍ କ୍ୟାମ୍ପସ୍ ପରିଦର୍ଶନ କରିଥିଲେ। ସେଠାରେ ବରିଷ୍ଠ ସେନା ଅଧିକାରୀମାନେ ପ୍ରତିଷ୍ଠାନର କାର୍ଯ୍ୟପ୍ରଣାଳୀ ଓ ଭୂମିକା ବିଷୟରେ ସବିଶେଷ ଅବଗତ କରାଇଥିଲେ।
୧୯୯୧ ମସିହାରେ ପ୍ରତିଷ୍ଠିତ ଏହି କମାଣ୍ଡ ଭାରତୀୟ ସେନାର ସର୍ବୋଚ୍ଚ ତାଲିମ କେନ୍ଦ୍ର ଭାବେ ପରିଚିତ ଓ ବର୍ତ୍ତମାନ ଦେଶ ଓ ବିଦେଶର ପ୍ରାୟ ୫୦ ହଜାର ସେନା କର୍ମଚାରୀଙ୍କୁ ପ୍ରତିବର୍ଷ ତାଲିମ ପ୍ରଦାନ କରୁଛି।ଆଧୁନିକ ଯୁଦ୍ଧର ପରିବର୍ତ୍ତିତ ଚରିତ୍ର ଉପରେ ଆଲୋକପାତ କରି ଅଧିକାରୀମାନେ ପ୍ରଯୁକ୍ତି ବ୍ୟବହାରର ଗୁରୁତ୍ୱକୁ ଉଦ୍ଘାଟନ କରିଥିଲେ। ସ୍ୱଦେଶୀ ପ୍ରଯୁକ୍ତି ଉନ୍ନୟନ ପାଇଁ ଆଇଆଇଟି ଓ ଅନ୍ୟାନ୍ୟ ପ୍ରତିଷ୍ଠାନ ସହିତ ଆର୍ଟରାକ୍ ସହଯୋଗ କରୁଥିବା କଥା ସେମାନେ କହିଥିଲେ। ଆଧୁନିକ ଯୁଦ୍ଧକୁ “ଅବଧାରଣାର ଯୁଦ୍ଧ” ବୋଲି ବର୍ଣ୍ଣନା କରି ସେନା ଓ ଗଣମାଧ୍ୟମ ମଧ୍ୟରେ ଅଧିକ ସମନ୍ୱୟ ଆବଶ୍ୟକତା ଉପରେ ମଧ୍ୟ ଜୋର ଦେଇଥିଲେ।
ପରେ ପ୍ରତିନିଧି ଦଳ ସେନା ଐତିହ୍ୟ ସଂଗ୍ରହାଳୟରେ ନବନିର୍ମିତ ‘ଶ୍ରଦ୍ଧାଞ୍ଜଳି ସ୍ଥଳ’ର ପୁନଃସମର୍ପଣ ସମାରୋହରେ ଯୋଗ ଦେଇଥିଲେ। ଏହି ସମାରୋହରେ ଦେବେନ୍ଦ୍ର ଶର୍ମାଙ୍କ ନେତୃତ୍ୱରେ ୫୨ ଫୁଟ ଉଚ୍ଚ ଜାତୀୟ ପତାକା ଉତ୍ସର୍ଗ କରାଯାଇଥିଲା। ଏହା ଜାତୀୟ ଏକତା, ଗର୍ବ ଓ ସୈନିକମାନଙ୍କ ବଳିଦାନର ପ୍ରତୀକ ଭାବେ ପରିଗଣିତ ହେଉଛି।ସମାରୋହରେ ସାମରିକ କର୍ମଚାରୀ, ପୂର୍ବତନ ସେନା ଓ ଏନସିସି କ୍ୟାଡେଟମାନେ ସହିଦ ସୈନିକମାନଙ୍କୁ ଶ୍ରଦ୍ଧାଞ୍ଜଳି ଜଣାଇଥିଲେ।
