ନ୍ୟୁଜ ଡେକ୍ସ : ଆସାମରେ ଘଟିଥିବା ସୁଖୋଇ–୩୦ ଏମକେଆଇ ଲଢ଼ୁଆ ବିମାନ ଦୁର୍ଘଟଣାରେ ଭାରତୀୟ ବାୟୁସେନାର ସ୍କ୍ୱାଡ୍ରନ୍ ଲିଡର ଅନୁଜ ଓ ଫ୍ଲାଇଟ୍ ଲେଫ୍ଟନାଣ୍ଟ ପୂର୍ବେଶ ଦୁରାଗକରଙ୍କ ମୃତ୍ୟୁ ଘଟିଛି। ଏହି ଘଟଣାରେ ଭାରତୀୟ ବାୟୁସେନା ଗଭୀର ଶୋକ ପ୍ରକାଶ କରିଛି।ବାୟୁସେନା ପକ୍ଷରୁ ସୋସିଆଲ ମିଡିଆରେ ପୋଷ୍ଟ କରି କୁହାଯାଇଛି ଯେ, ସମସ୍ତ ଭାରତୀୟ ବାୟୁସେନା କର୍ମଚାରୀ ଶୋକସନ୍ତପ୍ତ ପରିବାର ପ୍ରତି ଗଭୀର ସମବେଦନା ପ୍ରକାଶ କରୁଛନ୍ତି ଏବଂ ଏହି ଦୁଃଖର ସମୟରେ ସେମାନଙ୍କ ସହ ଦୃଢ଼ ଭାବରେ ଠିଆ ହୋଇଛନ୍ତି।
ଗୁରୁବାର ଦିନ ଏକ ଭାରତୀୟ ବାୟୁସେନା ସୁଖୋଇ–୩୦ ଏମକେଆଇ ଲଢ଼ୁଆ ବିମାନ ଆସାମର କାର୍ବି ଆଙ୍ଗଲଙ୍ଗ ଜିଲ୍ଲା ଉପରେ ଉଡ଼ୁଥିବା ସମୟରେ ହଠାତ୍ ରାଡାର ସଂଯୋଗ ହରାଇ ନିଖୋଜ ହୋଇଯାଇଥିଲା। ପ୍ରତିରକ୍ଷା ଜନସମ୍ପର୍କ ଅଧିକାରୀଙ୍କ ଅନୁସାରେ, ଏହା ଏକ ରୁଟିନ ମିଶନ ସମୟରେ ଘଟିଥିଲା।ବିମାନ ନିଖୋଜ ହେବା ପରେ ବାୟୁସେନା ପକ୍ଷରୁ ସନ୍ଧାନ ଓ ଉଦ୍ଧାର କାର୍ଯ୍ୟ ଆରମ୍ଭ କରାଯାଇଥିଲା। ସ୍ଥାନୀୟ ପ୍ରଶାସନ ଓ ଅନ୍ୟାନ୍ୟ ସୁରକ୍ଷା ଏଜେନ୍ସି ସହଯୋଗରେ ଘନ ଜଙ୍ଗଲ ଓ ପାହାଡ଼ିଆ ଅଞ୍ଚଳରେ ଖୋଜଖବର ଚାଲିଥିଲା।
ପରେ ବିମାନ ଦୁର୍ଘଟଣା ଘଟିଥିବା ସୂଚନା ମିଳିଥିଲା। ସୁଖୋଇ–୩୦ ଏମକେଆଇ ଭାରତୀୟ ବାୟୁସେନାର ଏକ ଆଗଧାଡ଼ିର ବହୁଭୂମିକା ଲଢ଼ୁଆ ବିମାନ ଓ ଦେଶର ବାୟୁ ପ୍ରତିରକ୍ଷା କ୍ଷମତାରେ ଏହାର ଗୁରୁତ୍ୱପୂର୍ଣ୍ଣ ଭୂମିକା ରହିଛି। ପୂର୍ବରୁ ମଧ୍ୟ ଏହି ବିମାନ ସହିତ କିଛି ଦୁର୍ଘଟଣା ଘଟିଥିବା ଦେଖାଯାଇଛି। ୨୦୧୯ ମସିହାରେ ଆସାମର ତେଜପୁର ନିକଟରେ ଏକ ସୁଖୋଇ–୩୦ ଦୁର୍ଘଟଣାଗ୍ରସ୍ତ ହୋଇଥିଲା ଯେଉଁଠାରେ ପାଇଲଟମାନେ ସୁରକ୍ଷିତ ଭାବେ ବାହାରି ପାରିଥିଲେ। ଏହି ଦୁର୍ଘଟଣା ପରେ ବିମାନ ଦୁର୍ଘଟଣାର କାରଣ ଖୋଜିବା ପାଇଁ ବାୟୁସେନା ପକ୍ଷରୁ ତଦନ୍ତ ଆରମ୍ଭ କରାଯାଇଛି।
