ନ୍ୟୁଜ ଡେକ୍ସ : ପଶ୍ଚିମ ଏସିଆରେ ଚାଲିଥିବା ଉତ୍ତେଜନା ମଧ୍ୟରେ ଭାରତ ପାଇଁ ଏକ ବଡ଼ ଆଶ୍ୱସ୍ତିକର ଖବର ସାମ୍ନାକୁ ଆସିଛି। ହର୍ମୁଜ୍ ପ୍ରଣାଳୀ ଦେଇ ଭାରତ ଅଭିମୁଖେ ଆସୁଥିବା ତରଳ ପ୍ରାକୃତିକ ଗ୍ୟାସ ବାହୀ ଜାହାଜ ‘ଦିଶା’ ସୁରକ୍ଷିତ ଭାବେ ଏହି ଗୁରୁତ୍ୱପୂର୍ଣ୍ଣ ଜଳପଥ ଅତିକ୍ରମ କରିଛି। ଏହା ଫଳରେ ଫରାସୀ ଉପସାଗର ଅଞ୍ଚଳରେ ଅଟକି ରହିଥିବା ଭାରତ ଏବଂ ଅନ୍ୟ ଦେଶର ପତାକା ବହନ କରୁଥିବା ଅନ୍ୟ ୩୪ଟି ଜାହାଜ ମଧ୍ୟ ଶୀଘ୍ର ନିଜ ଗନ୍ତବ୍ୟସ୍ଥଳରେ ପହଞ୍ଚିବାର ସମ୍ଭାବନା ବଢ଼ିଯାଇଛି।ଜାହାଜ ଚଳାଚଳ ମନ୍ତ୍ରଣାଳୟର ନିର୍ଦ୍ଦେଶକ ଓପେଶ କୁମାର ଶର୍ମାଙ୍କ ସୂଚନା ଅନୁଯାୟୀ, ‘ଦିଶା’ ଜାହାଜରେ ୬୨ ହଜାର ୩୭୦ ଟନ୍ ତରଳ ପ୍ରାକୃତିକ ଗ୍ୟାସ ରହିଛି।
ଏହି ଜାହାଜ ଆସନ୍ତା ୧୮ ଜୁନରେ ଗୁଜରାଟର ଦାହେଜ ବନ୍ଦରରେ ପହଞ୍ଚିବାର ସମ୍ଭାବନା ରହିଛି। ଜାହାଜଟିର ସୁରକ୍ଷିତ ଯାତ୍ରା ପରେ ବର୍ତ୍ତମାନ ଅନ୍ୟ ଜାହାଜଗୁଡ଼ିକ ପାଇଁ ମଧ୍ୟ ରାସ୍ତା ସୁଗମ ହୋଇଥିବା ମନେ କରାଯାଉଛି। ଭାରତ ଅଭିମୁଖେ ଆସୁଥିବା ମୋଟ ଜାହାଜ ମଧ୍ୟରୁ ୧୫ଟି ଜାହାଜରେ କଚ୍ଚା ତେଲ, ତରଳ ପ୍ରାକୃତିକ ଗ୍ୟାସ ଏବଂ ତରଳ ପେଟ୍ରୋଲିୟମ ଗ୍ୟାସ ରହିଛି। ଦେଶର ଶକ୍ତି ସୁରକ୍ଷା ଦୃଷ୍ଟିରୁ ଏହି ଜାହାଜଗୁଡ଼ିକର ଆଗମନ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ବୋଲି କୁହାଯାଉଛି। ଏହା ଦେଶର ଇନ୍ଧନ ଯୋଗାଣ ବ୍ୟବସ୍ଥାକୁ ସୁଦୃଢ଼ କରିବା ସହ ଶିଳ୍ପ ଓ ଘରୋଇ ଆବଶ୍ୟକତା ପୂରଣରେ ସହାୟକ ହେବ।ଏହାବ୍ୟତୀତ ୧୬ଟି ଜାହାଜରେ ସାର ଏବଂ ସାର ଉତ୍ପାଦନ ପାଇଁ ଆବଶ୍ୟକ କଞ୍ଚାମାଲ ରହିଛି। ସେଥିମଧ୍ୟରୁ ୮ଟି ଜାହାଜରେ ୟୁରିଆ, ୪ଟି ଜାହାଜରେ ଡାଇ-ଅମୋନିୟମ ଫସଫେଟ, ୩ଟି ଜାହାଜରେ ଗନ୍ଧକ ଏବଂ ଗୋଟିଏ ଜାହାଜରେ ଅମୋନିଆ ଲୋଡ୍ ହୋଇଛି। କୃଷି କ୍ଷେତ୍ର ପାଇଁ ଏହି ସାମଗ୍ରୀଗୁଡ଼ିକ ଅତ୍ୟନ୍ତ ଜରୁରି ହୋଇଥିବାରୁ ସେଗୁଡ଼ିକର ଆଗମନ ଚାଷୀମାନଙ୍କ ପାଇଁ ଲାଭଦାୟକ ହେବ ବୋଲି ଆଶା କରାଯାଉଛି।ବିଶେଷଜ୍ଞମାନଙ୍କ ମତରେ, ଏହି ଜାହାଜଗୁଡ଼ିକ ଭାରତର କୃଷି ଓ ଶକ୍ତି କ୍ଷେତ୍ର ପାଇଁ ଜୀବନରେଖା ସଦୃଶ।
ବିଶେଷକରି ସାର ଓ ସାର ପ୍ରସ୍ତୁତି ସାମଗ୍ରୀର ଯୋଗାଣ ବୃଦ୍ଧି ପାଇଲେ କୃଷି ଉତ୍ପାଦନ ଉପରେ ସକାରାତ୍ମକ ପ୍ରଭାବ ପଡ଼ିବ। ମାଟିର ଉର୍ବରତା ବୃଦ୍ଧି ସହ ଖାଦ୍ୟଶସ୍ୟ ଉତ୍ପାଦନରେ ମଧ୍ୟ ସହାୟତା ମିଳିବ।ପଶ୍ଚିମ ଏସିଆର ଅସ୍ଥିର ପରିସ୍ଥିତି ଯୋଗୁଁ ଆନ୍ତର୍ଜାତିକ ସମୁଦ୍ର ପରିବହନ ଉପରେ ଚାପ ସୃଷ୍ଟି ହୋଇଥିବା ବେଳେ ‘ଦିଶା’ ଜାହାଜର ସୁରକ୍ଷିତ ଯାତ୍ରା ଭାରତ ପାଇଁ ଏକ ସକାରାତ୍ମକ ସଙ୍କେତ ଭାବେ ଦେଖାଯାଉଛି। ଏହା ଫଳରେ ଶକ୍ତି ଏବଂ କୃଷି କ୍ଷେତ୍ର ସମ୍ବନ୍ଧୀୟ ଆବଶ୍ୟକ ସାମଗ୍ରୀର ଯୋଗାଣ ନେଇ ଦେଖାଦେଇଥିବା ଆଶଙ୍କା ଅନେକାଂଶରେ ଦୂର ହୋଇଛି। ବର୍ତ୍ତମାନ ଅନ୍ୟ ଜାହାଜଗୁଡ଼ିକ ମଧ୍ୟ ସୁରକ୍ଷିତ ଭାବେ ଭାରତୀୟ ବନ୍ଦରରେ ପହଞ୍ଚିବେ ବୋଲି ସମ୍ପୃକ୍ତ ମହଲରେ ଆଶା ପ୍ରକାଶ ପାଇଛି।
