ନ୍ୟୁଜ ଡେକ୍ସ : ଆମେରିକା ଓ ଇରାନ ମଧ୍ୟରେ ବର୍ତ୍ତମାନ ଯୁଦ୍ଧବିରତି ରହିଥିବା ସତ୍ତ୍ୱେ ପରିସ୍ଥିତି କେବେ ଉତ୍ତେଜିତ ହେବ ତାହା ଅନିଶ୍ଚିତ। ଏହି ପରିପ୍ରେକ୍ଷିତରେ ତେଲ ଓ ଗ୍ୟାସ ଯୋଗାଣ ଉପରେ ପ୍ରଭାବ ପଡ଼ିବାର ଆଶଙ୍କା ରହିଥିଲା। କିନ୍ତୁ ଏହା ମଧ୍ୟରେ ଭାରତ ପାଇଁ ଏକ ଭଲ ଖବର ସାମ୍ନାକୁ ଆସିଛି। ପ୍ରାକୃତିକ ଗ୍ୟାସ ବହନକାରୀ ପ୍ରଥମ LNG ଟ୍ୟାଙ୍କର ସଫଳତାର ସହ ହର୍ମୁଜ୍ ପ୍ରଣାଳୀ ଦେଇ ପରିବହନ କରିଛି।
ମାର୍ଚ୍ଚ ମାସରେ ଆମେରିକା ଓ ଇସ୍ରାଏଲ ଇରାନ ବିରୋଧରେ ସାମରିକ କାର୍ଯ୍ୟାନୁଷ୍ଠାନ ଆରମ୍ଭ କରିବା ପରେ ଏହା ପ୍ରଥମ ଥର ପାଇଁ LNG ଟ୍ୟାଙ୍କର ଏହି ଗୁରୁତ୍ୱପୂର୍ଣ୍ଣ ସମୁଦ୍ର ପଥ ଦେଇ ଯାତାୟାତ କରିଛି। ଜାହାଜ ଟ୍ରାକିଂ ତଥ୍ୟ ଅନୁସାରେ ‘ମୁବାରାଜ’ ନାମକ ଜାହାଜ ସୋମବାର ଭାରତ ନିକଟରେ ଦେଖାଯାଇଥିଲା।ଏହି ଜାହାଜଟି ସଂଯୁକ୍ତ ଆରବ ଏମିରେଟ୍ସର ଆବୁ ଧାବି ନ୍ୟାସନାଲ୍ ଅଏଲ୍ କମ୍ପାନୀର ଦାସ୍ ଦ୍ୱୀପ ପ୍ଲାଣ୍ଟରୁ LNG ଲୋଡ୍ କରିଥିଲା ଏବଂ ଯୁଦ୍ଧ ଆରମ୍ଭ ପରେ ଉପସାଗର ଅଞ୍ଚଳରେ ଅଟକି ରହିଥିଲା। ମାର୍ଚ୍ଚ ୩୧ ତାରିଖରେ ଏହା ସଙ୍କେତ ପଠାଇବା ବନ୍ଦ କରିଦେଇଥିଲେ ମଧ୍ୟ ଏହି ସପ୍ତାହରେ ପୁନର୍ବାର ଭାରତୀୟ ଜଳସୀମା ନିକଟରେ ଦେଖାଯାଇଛି। ଏହା ହର୍ମୁଜ୍ ପ୍ରଣାଳୀରେ ଉତ୍ତେଜନା କମିବାର ସଙ୍କେତ ଦେଉଛି।
ସୂଚନା ଅନୁଯାୟୀ, ଜାହାଜଟି ଚୀନ ଆଡକୁ ଯାଉଥିବା ବେଳେ ମେ ମାସ ପ୍ରଥମ ସପ୍ତାହରେ ଭାରତ ଆସିପହଞ୍ଚିବା ସମ୍ଭାବନା ରହିଛି।LNG ଅର୍ଥାତ୍ ତରଳୀକୃତ ପ୍ରାକୃତିକ ଗ୍ୟାସ ଭାରତର ଶକ୍ତି ଯୋଗାଣ ବ୍ୟବସ୍ଥାରେ ଅତ୍ୟନ୍ତ ଜରୁରୀ। ପ୍ରାକୃତିକ ଗ୍ୟାସକୁ ପ୍ରାୟ -୧୬୨ ଡିଗ୍ରୀ ସେଲସିୟସରେ ଥଣ୍ଡା କରି ତରଳ ଆକାରରେ ପରିଣତ କରାଯାଇଥାଏ, ଯାହା ଦୀର୍ଘ ଦୂରତାକୁ ଜାହାଜ ଦ୍ୱାରା ପରିବହନ କରିବାକୁ ସହଜ କରେ।ହର୍ମୁଜ୍ ପ୍ରଣାଳୀ ବିଶ୍ୱର ସବୁଠାରୁ ଜରୁରୀ ଶକ୍ତି ପରିବହନ ମାର୍ଗମଧ୍ୟରୁ ଗୋଟିଏ, ଯାହା ଦ୍ୱାରା ବିଶ୍ୱର ପ୍ରାୟ ଏକ ପଞ୍ଚମାଂଶ LNG ଯୋଗାଣ ହୁଏ। ଏହି ମାର୍ଗରେ ଯାତାୟାତ ପୁନର୍ବାର ସାମାନ୍ୟ ହେବା ଭାରତ ସହ ଅନ୍ୟ ଦେଶମାନଙ୍କ ପାଇଁ ରାହାତର ସଙ୍କେତ ବୋଲି ମନେ କରାଯାଉଛି।
