ନ୍ୟୁଜ ଡେକ୍ସ : ହର୍ମୁଜ୍ ପ୍ରଣାଳୀକୁ ନେଇ ବୃଦ୍ଧି ପାଉଥିବା ଘଟଣା ମଧ୍ୟରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏକ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନେଇଛନ୍ତି। ସେ ଇରାନ ସହିତ ଚାଲିଥିବା ଯୁଦ୍ଧବିରତିକୁ ବୃଦ୍ଧି କରିବାକୁ ଘୋଷଣା କରିଛନ୍ତି। ଇରାନ ପକ୍ଷରୁ ଆମେରିକାକୁ ପ୍ରସ୍ତାବ ଦିଆଯାଇ ଆଲୋଚନା ସମ୍ପୂର୍ଣ୍ଣ ନହେବା ପର୍ଯ୍ୟନ୍ତ ଏହି ଯୁଦ୍ଧବିରତି ଜାରି ରହିବ ବୋଲି ସେ ସ୍ପଷ୍ଟ କରିଛନ୍ତି।ଏହି ନିଷ୍ପତ୍ତି ପଛରେ ପାକିସ୍ତାନର ଅନୁରୋଧ ଗୁରୁତ୍ୱପୂର୍ଣ୍ଣ ଥିବା ଜଣାପଡ଼ିଛି।
ପାକିସ୍ତାନ ସରକାର ଇରାନ ବିରୁଦ୍ଧରେ ଯୁଦ୍ଧବିରତି ପାଇଁ ଦ୍ୱିତୀୟ ସୁଯୋଗ ଚାହିଥିବାରୁ ଏହାକୁ ବଢ଼ାଯାଇଛି।ଟ୍ରମ୍ପ ତାଙ୍କ ଟ୍ରୁଥ୍ ସୋସିଆଲ ଆକାଉଣ୍ଟରେ କହିଛନ୍ତି ଯେ ଇରାନର ସରକାର ଅବ୍ୟବସ୍ଥିତ ଅବସ୍ଥାରେ ରହିଛି, ତଥାପି ଏହାକୁ ଆଉ ଏକ ସୁଯୋଗ ଦେବା ପାଇଁ ସେ ଯୁଦ୍ଧବିରତିକୁ ବୃଦ୍ଧି କରିଛନ୍ତି। ପାକିସ୍ତାନର ଫିଲ୍ଡ ମାର୍ଶାଲ ସୟଦ ଅସୀମ ମୁନିର ଓ ପ୍ରଧାନମନ୍ତ୍ରୀ ଶହବାଜ ସରିଫଙ୍କ ଅନୁରୋଧକୁ ଗୁରୁତ୍ୱ ଦେଇ ଇରାନ ଉପରେ ଆକ୍ରମଣ ବନ୍ଦ କରାଯାଇଛି। ତେବେ ଯୁଦ୍ଧବିରତି ବୃଦ୍ଧି ହେଲେ ମଧ୍ୟ ସ୍ଥିତି ସମ୍ପୂର୍ଣ୍ଣ ଶାନ୍ତ ହୋଇନାହିଁ। ହର୍ମୁଜ୍ ପ୍ରଣାଳୀରେ ଇରାନ ପକ୍ଷରୁ ଅବରୋଧ ଜାରି ରହିଥିବା ବେଳେ ଆମେରିକା ନୌସେନା ମଧ୍ୟ ଇରାନ ବନ୍ଦର ଉପରେ ନଜର ରଖିଛି।
ଟ୍ରମ୍ପ ସ୍ପଷ୍ଟ କରିଛନ୍ତି ଯେ ଏହି ନିଷ୍ପତ୍ତିର ଅର୍ଥ ଯୁଦ୍ଧ ଶେଷ ହେବା ନୁହେଁ।ଏହି ପଦକ୍ଷେପ ପାଇଁ ପାକିସ୍ତାନ ଟ୍ରମ୍ପଙ୍କୁ ଧନ୍ୟବାଦ ଜଣାଇଛି। ପାକିସ୍ତାନ ପ୍ରଧାନମନ୍ତ୍ରୀ ତାଙ୍କ ସୋସିଆଲ ମିଡିଆ ପୋଷ୍ଟରେ କହିଛନ୍ତି ଯେ ଯୁଦ୍ଧବିରତି ବୃଦ୍ଧି ମଧ୍ୟପ୍ରାଚ୍ୟରେ ଶାନ୍ତି ପ୍ରୟାସକୁ ଏକ ନୂଆ ଦିଗ ଦେଇଛି। ଇସଲାମାବାଦରେ ଆଗାମୀ ଆଲୋଚନା ମାଧ୍ୟମରେ ଦୁଇ ପକ୍ଷ ମଧ୍ୟରେ ଶାନ୍ତି ଚୁକ୍ତି ସମ୍ଭବ ବୋଲି ଆଶା କରାଯାଉଛି।ସମ୍ପୂର୍ଣ୍ଣ ପରିସ୍ଥିତି ଉପରେ ବିଶ୍ୱର ନଜର ରହିଥିବା ବେଳେ, ଏହି ଯୁଦ୍ଧବିରତି ଆଗାମୀ ଦିନରେ କେଉଁ ଦିଗକୁ ଯିବ ସେଥିପାଇଁ ଅପେକ୍ଷା ଜାରି ରହିଛି।
