ନ୍ୟୁଜ ଡେକ୍ସ : ପ୍ରାୟ ୪୭ ବର୍ଷ ପରେ ଦୁଇ ଦକ୍ଷିଣ ଭାରତୀୟ ସୁପରଷ୍ଟାର ରଜନୀକାନ୍ତ ଏବଂ କମଲ ହାସନ ପୁଣିଥରେ ଏକାଠି ପର୍ଦ୍ଦାରେ ନଜର ଆସିବେ। ପୂର୍ବରୁ ସେମାନେ ୧୯୭୯ ମସିହାରେ ଆଲ୍ଲାଉଦ୍ଦିନମ୍ ଆଲଭୁଥା ଭିଲାକୁମ୍ ଫିଲ୍ମରେ ସହଯୋଗ କରିଥିଲେ। ଏବେ ଏହି ଐତିହାସିକ ଯୋଡିକୁ ନେଇ ନୂଆ ପ୍ରୋଜେକ୍ଟ ଘୋଷଣା କରାଯାଇଛି।ନିର୍ମାତାମାନେ ଶୁକ୍ରବାର ଦିନ ଏହି ବହୁପ୍ରତୀକ୍ଷିତ ଫିଲ୍ମ ସମ୍ବନ୍ଧରେ ଆନୁଷ୍ଠାନିକ ଘୋଷଣା କରିଥିଲେ।
ଏହି ଚଳଚ୍ଚିତ୍ରକୁ ନେଲସନ ଦିଲୀପ କୁମାର ନିର୍ଦ୍ଦେଶନା କରିବେ। ସଂଗୀତ ନିର୍ଦ୍ଦେଶନାର ଦାୟିତ୍ୱ ନେଇଛନ୍ତି ଅନିରୁଦ୍ଧ ରବିଚନ୍ଦ୍ର। ଫିଲ୍ମର ଅସ୍ଥାୟୀ ନାମ ‘KH x RK ରିୟୁନିଅନ୍’ ରଖାଯାଇଛି।ନିର୍ମାତାମାନେ ଏକ ଭିଡିଓ ପ୍ରୋମୋ ମାଧ୍ୟମରେ ଏହି ଘୋଷଣା କରିଛନ୍ତି। ୩ ମିନିଟ୍ ୪୭ ସେକେଣ୍ଡର ଏହି ପ୍ରୋମୋରେ ରଜନୀକାନ୍ତ ଓ କମଲ ହାସନଙ୍କୁ ରେଟ୍ରୋ ଲୁକ୍ରେ ଦେଖିବାକୁ ମିଳିଛି। ପ୍ରୋମୋର ଆରମ୍ଭରେ ନେଲସନ ଏକ କରିଡରରେ ଠିଆ ହୋଇ ଭାବୁଥିବା ଦେଖାଯାଏ ଯେ ସେ କେଉଁ ତାରକାଙ୍କ କୋଠରୀରେ ପ୍ରଥମେ ପ୍ରବେଶ କରିବେ। ପରେ ଅନିରୁଦ୍ଧ ଆସି ତାଙ୍କୁ ଦୁଇଟି ଆଙ୍ଗୁଠି ମଧ୍ୟରୁ ବାଛିବାକୁ କହିଥାନ୍ତି, ଯାହା ପ୍ରୋମୋକୁ ଆହୁରି ଆକର୍ଷଣୀୟ କରିଛି। ଏହାପୂର୍ବରୁ ଏକ ପୋଷ୍ଟର ଜାରି କରାଯାଇଥିଲା, ଯେଉଁଥିରେ ଉଭୟ ଅଭିନେତାଙ୍କ ହାତ ଓ ଜ୍ୟାକେଟ୍ ପିନ୍ଧିଥିବା ଲୁକ୍ ଦେଖାଯାଇଥିଲା।
ପୋଷ୍ଟରର କ୍ୟାପସନରେ ଲେଖାଯାଇଥିଲା, ‘କିଛି ଲୋକ ନିୟମ ତିଆରି କରନ୍ତି, ଆଉ କିଛି ରାଜ।’ଫିଲ୍ମଟି ନେଲସନଙ୍କ ଦ୍ୱାରା ଲିଖିତ ଓ ନିର୍ଦ୍ଦେଶିତ ହେଉଥିବା ବେଳେ ଶୁଟିଂ ଖୁବ୍ ଶୀଘ୍ର ଆରମ୍ଭ ହେବ। ପ୍ରୋମୋରୁ ସ୍ପଷ୍ଟ ହେଉଛି ଯେ ଏହି ପ୍ରୋଜେକ୍ଟ କେବଳ ଏକ ଫିଲ୍ମ ନୁହେଁ, ବରଂ ତାମିଲ ସିନେମା ଇତିହାସରେ ଏକ ବଡ଼ ଇଭେଣ୍ଟ ସାବ୍ୟସ୍ତ ହେବ। ଇଣ୍ଡଷ୍ଟ୍ରୀର ସବୁଠାରୁ ବଡ଼ ଦୁଇ ତାରକାଙ୍କ ଏହି ଯୋଡିକୁ ନେଇ ଦର୍ଶକମାନଙ୍କ ମଧ୍ୟରେ ଉତ୍ସାହ ଚରମ ସୀମାକୁ ପହଞ୍ଚିଛି।
