ନ୍ୟୁଜ ଡେକ୍ସ : ଇରାନ ଓ ଆମେରିକା-ଇସ୍ରାଏଲ ମଧ୍ୟରେ ଚାଲିଥିବା ଯୁଦ୍ଧ ଏବେ ଚତୁର୍ଥ ସପ୍ତାହରେ ପ୍ରବେଶ କରିଛି। ଯୁଦ୍ଧ ବନ୍ଦ ହେବା ନେଇ କୌଣସି ସ୍ପଷ୍ଟ ସଙ୍କେତ ମିଳୁନଥିବା ବେଳେ ସମଗ୍ର ଅଞ୍ଚଳରେ ଉତ୍ତେଜନାପୂର୍ଣ୍ଣ ପରିସ୍ଥିତି ଜାରି ରହିଛି।ନିରନ୍ତର ନୂତନ ଆକ୍ରମଣ, ବଢୁଥିବା ମୃତାହତ ଓ ଦୁଇପକ୍ଷର ତୀବ୍ର ବୟାନବାଜି ଯୋଗୁଁ ଅନିଶ୍ଚିତତା ଆହୁରି ବଢ଼ିଛି।
ବିଶ୍ୱର ଧ୍ୟାନ ବର୍ତ୍ତମାନ ରଣନୈତିକ ଭାବରେ ଗୁରୁତ୍ୱପୂର୍ଣ୍ଣ ହରମୁଜ୍ ପ୍ରଣାଳୀ ଉପରେ କେନ୍ଦ୍ରିତ, କାରଣ ବିଶ୍ୱ ତୈଳ ଯୋଗାଣର ଏକ ବଡ଼ ଅଂଶ ଏହି ରାସ୍ତା ଦେଇ ଯାଉଛି। ଏହି ପରିପ୍ରେକ୍ଷିତରେ ବିଭିନ୍ନ ଦେଶ ବାଣିଜ୍ୟ ଜାହାଜର ସୁରକ୍ଷା ନେଇ ଚିନ୍ତା ବ୍ୟକ୍ତ କରିଛନ୍ତି।ଏପଟେ ଆମେରିକାର ରାଷ୍ଟ୍ରପତି Donald Trump କହିଛନ୍ତି ଯେ ଇରାନ ସହିତ ଆଲୋଚନା ଚାଲିଛି ଏବଂ ଇରାନ ବୁଝାମଣା ପାଇଁ ଆଗ୍ରହ ଦେଖାଉଛି। ହେଲେ ଇରାନୀ ଅଧିକାରୀମାନେ ଏହାକୁ ସପଟେ ପ୍ରତ୍ୟାଖ୍ୟାନ କରି ଏହାକୁ ମିଥ୍ୟା ଖବର ବୋଲି କହିଛନ୍ତି। ଅନ୍ୟପଟେ ଇରାନର ବୁଶେହର ପରମାଣୁ ଶକ୍ତି କେନ୍ଦ୍ର ଉପରେ କ୍ଷେପଣାସ୍ତ୍ର ଆକ୍ରମଣ ହୋଇଥିବା ଖବର ମିଳିଛି।
ଇରାନର ପରମାଣୁ ଶକ୍ତି ସଂଗଠନ କହିଛି ଯେ ଏଥିରେ କୌଣସି କ୍ଷତି ହୋଇନାହିଁ। ଏହାସହ ଇରାନ ଚେତାବନୀ ଦେଇଛି ଯେ ଶାନ୍ତିପୂର୍ଣ୍ଣ ପରମାଣୁ ପ୍ରତିଷ୍ଠାନ ଉପରେ ଆକ୍ରମଣ ଅନ୍ତର୍ଜାତୀୟ ନିୟମ ଉଲ୍ଲଂଘନ ସମାନ।ଇସଫାହାନରେ ମଧ୍ୟ ସାମରିକ ଏବଂ ଅସ୍ତ୍ରଶସ୍ତ୍ର ନିର୍ମାଣ କେନ୍ଦ୍ର ଉପରେ ବିମାନ ଆକ୍ରମଣ ହୋଇଥିବା ଖବର ଆସିଛି। ଇସ୍ରାଏଲ ରକ୍ଷା ବଳ ପକ୍ଷରୁ କୁହାଯାଇଛି ଯେ ଏହି ଆକ୍ରମଣରେ ଇରାନର ଗୁରୁତ୍ୱପୂର୍ଣ୍ଣ ବିସ୍ଫୋରକ ଉତ୍ପାଦନ କେନ୍ଦ୍ରକୁ ଟାର୍ଗେଟ କରାଯାଇଥିଲା। ତଥାପି ଏହାକୁ ଇରାନ ପକ୍ଷରୁ ଏପର୍ଯ୍ୟନ୍ତ ସ୍ଥିର କରାଯାଇନାହିଁ।ସାମଗ୍ରିକ ଭାବେ ଦେଖିଲେ, ଯୁଦ୍ଧ ପରିସ୍ଥିତି ଦିନକୁ ଦିନ ଅଧିକ ଗୁରୁତର ହେଉଛି ଏବଂ ଶାନ୍ତି ପାଇଁ କୌଣସି ସ୍ପଷ୍ଟ ପଥ ଏପର୍ଯ୍ୟନ୍ତ ଦେଖାଯାଉନାହିଁ।
