ନ୍ୟୁଜ ଡେକ୍ସ : ପଶ୍ଚିମବଙ୍ଗ ଏବଂ ତାମିଲନାଡୁ ବିଧାନସଭା ନିର୍ବାଚନ ପାଇଁ ଆଜି ସକାଳ ୭ଟାରୁ ମତଦାନ ଆରମ୍ଭ ହୋଇଯାଇଛି। ତାମିଲନାଡୁର ସମସ୍ତ ୨୩୪ଟି ଆସନରେ ଭୋଟ ଗ୍ରହଣ ଚାଲିଥିବା ବେଳେ ପଶ୍ଚିମବଙ୍ଗର ୧୫୨ଟି ଆସନରେ ମଧ୍ୟ ମତଦାନ ଜାରି ରହିଛି। ଉଭୟ ରାଜ୍ୟରେ ସନ୍ଧ୍ୟା ୬ଟା ପର୍ଯ୍ୟନ୍ତ ମତଦାନ ଚାଲିବ।ପ୍ରାରମ୍ଭିକ ରିପୋର୍ଟ ଅନୁଯାୟୀ ମତଦାନ କେନ୍ଦ୍ରଗୁଡ଼ିକରେ ଭୋଟରଙ୍କ ଭିଡ଼ ଦେଖାଯାଉଛି।
ପଶ୍ଚିମବଙ୍ଗରେ ତୃଣମୂଳ କଂଗ୍ରେସ ଏବଂ ଭାରତୀୟ ଜନତା ପାର୍ଟି ମଧ୍ୟରେ କଡ଼ା ମୁକାବିଲା ହେଉଥିବା ବେଳେ ତାମିଲନାଡୁରେ ଡିଏମକେ ନେତୃତ୍ୱାଧୀନ ମହାଗଠବନ୍ଧନ ଓ ଏଆଇଏଡିଏମକେ-ବିଜେପି ଏନଡିଏ ମଧ୍ୟରେ ମଧ୍ୟ ତୀବ୍ର ପ୍ରତିଦ୍ୱନ୍ଦ୍ୱିତା ଚାଲିଛି।ପଶ୍ଚିମବଙ୍ଗର ବୀରଭୂମିର ପ୍ରିଜାଇଡିଂ ଅଧିକାରୀ ସ୍ୱାତି ସରକାର ପାଲ କହିଛନ୍ତି ଯେ ମତଦାନ କେନ୍ଦ୍ରରେ ସୁରକ୍ଷା ବ୍ୟବସ୍ଥା କଡ଼ାକଡ଼ି କରାଯାଇଛି। ସୁରକ୍ଷା କର୍ମଚାରୀମାନେ ବାହାରେ ବ୍ୟବସ୍ଥା ପରିଚାଳନା କରୁଥିବା ବେଳେ ବିଏଲଓମାନେ ଭିତରେ ଭୋଟରମାନଙ୍କୁ ମାର୍ଗଦର୍ଶନ କରୁଛନ୍ତି। ଇଭିଏମ୍ ସଠିକ ଭାବରେ କାମ କରୁଛି ଏବଂ କୌଣସି ସମସ୍ୟା ହେଲେ ୧୫ ମିନିଟ୍ ମଧ୍ୟରେ ମେସିନ୍ ପରିବର୍ତ୍ତନ କରାଯିବ ବୋଲି ସେ କହିଛନ୍ତି।
ପଶ୍ଚିମବଙ୍ଗର ପ୍ରଥମ ପର୍ଯ୍ୟାୟ ମତଦାନରେ ୧୬ଟି ଜିଲ୍ଲାର ୧୫୨ଟି ଆସନ ଅନ୍ତର୍ଭୁକ୍ତ ହୋଇଛି। ଏଠାରେ ପ୍ରାୟ ୩ କୋଟି ୬୦ ଲକ୍ଷ ଭୋଟର ୧୪୫୨ ଜଣ ପ୍ରାର୍ଥୀଙ୍କ ଭାଗ୍ୟ ନିର୍ଣ୍ଣୟ କରିବେ। ଶାନ୍ତିପୂର୍ଣ୍ଣ ଭୋଟଗ୍ରହଣ ପାଇଁ କଡ଼ା ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଥିବା ବେଳେ ସକାଳଠାରୁ ଭୋଟରମାନେ ଧାଡ଼ିରେ ଠିଆ ହୋଇ ମତଦାନ କରୁଛନ୍ତି।
