ନ୍ୟୁଜ ଡେକ୍ସ : ଆସନ୍ତା ୨୩ ଏପ୍ରିଲରେ ତାମିଲନାଡୁ ଓ ପଶ୍ଚିମବଙ୍ଗରେ ବିଧାନସଭା ନିର୍ବାଚନ ପାଇଁ ମତଦାନ ହେବାକୁ ଯାଉଛି। ଏହାକୁ ଦୃଷ୍ଟିରେ ରଖି ଭାରତୀୟ ନିର୍ବାଚନ କମିଶନ ଉଭୟ ରାଜ୍ୟରେ ଭୋଟ୍ ପ୍ରକ୍ରିୟା ଶେଷ ହେବା ପର୍ଯ୍ୟନ୍ତ ୪୮ ଘଣ୍ଟା ପାଇଁ ‘ଡ୍ରାଏ ଡେ’ ପାଳନ କରିବାକୁ ନିର୍ଦ୍ଦେଶ ଜାରି କରିଛନ୍ତି। ଏହି ନିଷ୍ପତ୍ତି ଅନୁଯାୟୀ, ଭୋଟଦାନ ସମାପ୍ତ ହେବା ପର୍ଯ୍ୟନ୍ତ ଉଭୟ ରାଜ୍ୟର ସମ୍ପୃକ୍ତ ଅଞ୍ଚଳରେ ମଦ୍ୟପାନ ବିକ୍ରୟ ଓ ବଣ୍ଟନ ସମ୍ପୂର୍ଣ୍ଣ ଭାବେ ନିଷେଧ ରହିବ।
ନିର୍ବାଚନ ସମୟରେ କୌଣସି ପ୍ରକାରର ଅନିୟମିତତା, ଭୋଟରଙ୍କୁ ପ୍ରଭାବିତ କରିବା ଚେଷ୍ଟା କିମ୍ବା ଆଇନ ଶୃଙ୍ଖଳା ସମସ୍ୟା ଉଦ୍ଭବ ହେବାକୁ ରୋକିବା ପାଇଁ କମିଶନ ଏହି ପଦକ୍ଷେପ ନେଇଛନ୍ତି। ସୁରକ୍ଷା ବ୍ୟବସ୍ଥାକୁ ମଧ୍ୟ କଡାକଡି କରାଯାଇଛି, ଯାହାଦ୍ୱାରା ଭୋଟ୍ ପ୍ରକ୍ରିୟା ସ୍ୱଚ୍ଛ ଓ ଶାନ୍ତିପୂର୍ଣ୍ଣ ଭାବେ ସମ୍ପନ୍ନ ହେବ।୨୦୨୬ ପଶ୍ଚିମବଙ୍ଗ ବିଧାନସଭା ନିର୍ବାଚନ ଦୁଇ ପର୍ଯ୍ୟାୟରେ ଆୟୋଜିତ ହେବ। ପ୍ରଥମ ପର୍ଯ୍ୟାୟର ଭୋଟ୍ ୨୩ ଏପ୍ରିଲରେ ହେବାକୁ ଥିବାବେଳେ ଏଥିରେ ୧୫୨ଟି ବିଧାନସଭା ଆସନ ଅନ୍ତର୍ଭୁକ୍ତ ରହିଛି।
ଦ୍ୱିତୀୟ ପର୍ଯ୍ୟାୟର ଭୋଟ୍ ୨୯ ଏପ୍ରିଲରେ ହେବ ଓ ଏଥିରେ ବାକି ୧୪୨ଟି ଆସନ ରହିବ। ମୋଟ ୨୯୪ଟି ଆସନର ଫଳାଫଳ ମେ ୪ରେ ଘୋଷଣା କରାଯିବ।ଅନ୍ୟପଟେ ତାମିଲନାଡୁ ବିଧାନସଭା ନିର୍ବାଚନ ଗୋଟିଏ ପର୍ଯ୍ୟାୟରେ ହେବ। ଏପ୍ରିଲ ୨୩ରେ ରାଜ୍ୟର ସମସ୍ତ ୨୩୪ଟି ଆସନ ପାଇଁ ଏକାଧାରେ ଭୋଟ୍ ଗ୍ରହଣ କରାଯିବ। ଭୋଟ୍ ପୂର୍ବରୁ ୪୮ ଘଣ୍ଟା ଆଗରୁ ସମଗ୍ର ରାଜ୍ୟରେ ଡ୍ରାଏ ଡେ ଲାଗୁ କରାଯାଇଛି, ଯାହା ଭୋଟ୍ ସମାପ୍ତି ପର୍ଯ୍ୟନ୍ତ ଜାରି ରହିବ।ନିର୍ବାଚନ କମିଶନଙ୍କ ଏହି ପଦକ୍ଷେପ ଦ୍ୱାରା ଶାନ୍ତିପୂର୍ଣ୍ଣ ଓ ସ୍ୱଚ୍ଛ ଭୋଟ୍ ପ୍ରକ୍ରିୟା ସୁନିଶ୍ଚିତ ହେବ ବୋଲି ଆଶା କରାଯାଉଛି।
